Timorpost.com | MANUFAHI – Autoridade suku Babulo iha segunda loron (11/05/2023, kestiona komunidade balun nia osan lakon iha Banku Komérsiu Timor-Leste (BNCTL) sukursál Same. Maibé kestaun ne’e rezolvidu.
Informasaun ne’e Timor post halo publikasaun iha fulan hirak ba kotuk nune’e hetan kedas atensaun husi parte BNCTL superior Nasionál mai iha BNCTL sukursál Same.
Relasiona ho asuntu ne’e, iha Kinta (11/05) Administradór Munisípiu Manufahi (AMM), realiza sorumutu ho lideransa komunitáriu suku Babulo, autoridade postu Same, ho jerenti (BNCTL) sukursal Same hodi klarifika difikuldade téknika ne’ebé mosu hodi hamosu desentendementu.
Administradór Munisípiu Manufahi Arantes Isaac Sarmento haktuir, enkontru ne’e liga ho preokupasaun osan lakon iha BNCTL sukursál Same no funsionáriu foti saláriu balun lakon to’o dollar atus ida.
“Ne’e duni ho enkontru ne’e atu klarifika ba malu kona-ba informasaun ne’ebé mosu iha ona iha ona solusaun ka seidauk, ” dehan Arantes iha salaun administrasaun Munisípiu Manufahi, Kinta ne’e.
Fatin hanesan Koordenadór BNCTL sukursál Same, Camilo Alves Soares klarifika informasaun ne’ebé media publika sai no ida ne’e superior BNCTL mós preokupa.
“Ami nia superior sira preokupa tebes ho informasaun ne’ebé públika iha media balun katak xefe suku Babulo levanta dehan osan lakon iha BNCTL” nia dehan.
“Ha’u nia superior sira orienta kedas ha’u buka tuir informasaun ne’e los ka lae, se loos banku bele selu fali, ho orientasaun ne’e ha’u rasik ba hasoru kedas xefe suku Babulo inklui kliente na’in rua”
Camilo deklara, antes ne’e, kliente ida ba hasoru ona nia dala rua hodi halo esplikasaun kona-ba situasaun ne’ebé mosu no banku halo esplikasaun ba kliente Antonino ho nia família ida sai hanesan sasin atu hare fila fali tranzasaun status bankária no CCTV ne’ebé iha.
Maibé rezultadu hatudu duni no kliente rasik rekoñese katak osan ne’e kliente Antonino rasik maka foti duni ho surat tahan sai husi mákina ATM ne’ebé sai ho osan nia montante loloos. Nune’e kliente refere hateten duni osan ne’ebé nia foti parese lakon iha dalan ou iha areador banku nian tanba la sente osan monu iha dalan.
Jerente hakle’an, kona ba xefe suku nia laen kaben saláriu ne’e tanba bainhira kliente ne’e ba hatama kartaun ATM atu foti osan akontese liña internet monu ne’e duni osan la sai maibé ba check fali osan saldo menus maibé loron ne’e kedas hafoin minutu 30 sistema rekupera osan iha saldo kompletu fila fali hanesan normál, no loron tuir mai kliente check fali saláriu kompletu fali.
“Situasaun ida ne’e maka ami hasoru durante ne’e, la’ós Manufahi de’it maibé kuaze munisípiu hotu bainhira liña Internet monu sempre hasoru, tanba ne’e kliente sira hasoru problema bele husu informasaun ba funsionáriu BNCTL parte informasaun nian hodi buka rezolve” nia rekoñese.
Ba kestaun ne’e xefe suku Babulo Alice de Jesus Nunes relata, bainhira rona informasaun iha baze tenke levanta iha enkontru hodi hadi’a sistema ne’ebé mosu iha banku.
“Jerente BNCTL sukursál Same halo ona klarifikasaun ba ami no konsidera tanba klareza inklui rezolvidu ona” haktuir Xefe Suku.
4,524 total views, 6 views today
