DILI (timorpost.com) – Dili Institute of Technology (DIT) liuhusi fakuldade Turizmu Hospitality, departamentu Tour and Travel Managamentu promove estudante sira nia kreatividade ho lian ingles no dansa kultura.
“Ami realiza eventu ida ne’e ho objetivu hodi promove foin sa’e nia matenek no hatudu liuhusi talentu hodi valoriza no promove arte ho kultura ho atividade dansa kultura no diskursu lian inglés,” prezidente Komisaun organizadór ba eventu provome lian ingles, Aniston Guro Neves, hateten ba Timor Post iha DIT Manleuana, Kinta (25/05).
Nia dehan, atividade diskursu ho lian ingles no dansa kultura ne’e enkoraja munisípiu ida-idak nia estudante sira liuliu sira nia mentalidade di’ak oinsá iha futuru bele promove sira nia talentu ho di’ak hodi kompete iha futuru.
Tanba ne’e maka kada tinan realiza atividade diskursu ba estudante sekundária sira hodi halo pratika liuhusi diskursu ho lian ingles atu nune’e sira bele iha ona koñesimentu uitoan karik iha futuru sira bele kompete iha kampu servisu.
Entretantu, diskursu ho lian ingles ne’e primeira lugar sei hetan prémiu piala, sertifikadu ho orsamentu montante 300 USD, segundu lugar ho montante 200 USD no terseiru lugar 150 USD.
Enkuantu, aprezentasaun dansa kultura Noi Nonoi nian primeiru lugar sei hetan osan 400 USD, segundu lugar ho montante 200 USD no terseiru lugar sei hetan osan 150 USD.
Portantu, dansa kultura primeira lugar sei hetan prémiu ho sertifikadu, piala ho osan montante 500 USD, segundu lugar 300 USD no terseiru lugar 200 USD.
Nia dehan, estudante hirak ne’ebé partisipa iha eventu ne’e mai husi eskola sekundária Katólika Amigo de Jesus Bekora, Eskola sekundária Koléjiu São Miguel, Eskola sekundária São Pedro Komoro, Eskola Sekundária Katólika São José Balidi, Eskola Sekundária Jerál Kay Rala Xanana Gusmão Manatutu, Eskola Sekundária Jerál Tibar no Eskola Kafé Dili.
Iha fatin hanesan, Reitór DIT, Salustiano dos Reis Piedade, reforsa, atividade loron rua ne’e hodi promove foin sa’e no estudante husi nivel superior no estudante sekundária husi Dili no estudante sekundária husi munisípiu Likisá no Manatutu hodi hatudu sira nia talentu atu valoriza no promove arte ho kultura iha Timor-Leste.
Objetivu seluk maka hasae koñesimentu no abilidade liuhusi kreatividade oi-oin hodi prepara sira nia an ho di’ak, no maduru hodi kompete iha futuru oin mai liuliu oinsá atu debate iha públiku sira bele iha koñesimentu ne’ebé di’ak.
Tanba ne’e, husu ba estudante sira aproveita oportunidade diskursu hanesan ne’e hodi eleva no hasae koñesimentu di’ak liután bainhira termina sira nia estudu iha eskola entaun bele kompete iha kampu servisu iha terenu.
Reitór DIT ne’e agradese ba doadór husi Timor Plaza, Timor Telecom, Kooperativa ne’ebé suporta fundu no suporta material hodi realiza eventu diskursu ba estudante ho lian ingles no dansa kultura no grupu Nono Nonoi hodi promove sira nia talentu kultura to’o susesu. Enkuantu, orsamentu hodi realiza atividade ho montante hamutuk rihun 12 USD husi doadór sira nia apoiu.
2,244 total views, 3 views today
Bele hare Video Seluk :
Subscribe to Timorpost
