Dili (Timor Post)—Institutu Superior Filozofia no Teolojia (ISFIT), Dom Jaime Garcia Goulart Fatumeta-Dili, Sesta-feira (01/07) ne’e, ofisialmente realiza asinatura nota de entendimentu (MOU, Sigla Inglés) ho Fakuldade Filozofia no Siénsia Humana husi Universidade Nasionál Timor Loro sa’e (UNTL).
“Objetivu prinsipál husi asinatura nota de entendimentu ida ne’e atu ISFIT bele halo kooperasaun di’ak liu tan ho UNTL iha pillar tolu mak iha área Desénsia, peskiza no Serbisu Sosiál, hodi nune’e ba oin bele serbisu hamutuk ho di’ak liu tan entre ISFIT ho UNTL,” dehan reitór Institutu Superior Filozofia no Teolojia (ISFIT), Pe. Justino Tanec, hafoin termina husi serimónia asinatura nota entendimentu, iha salaun Semináriu Maiór Fatumeta-Dili.
Nia esplika, kooperasaun iha pillar rekursu umanu iha parte desénsia nian ba oin dosente sira husi UNTL bele hanorin iha ISFIT no husi ISFIT dosente balu bele ba hanorin mós iha UNTL de maneira gratuita, iha área peskiza nian mós husi Instituisaun rua ne’e sei halo parseria konjuntu ida iha área prioridade no tema sira ne’ebe estabelesidu husi instituisaun rua refere.
“Buat ne’ebé importante husi Instituisaun rua ne’e la’ós atu tranzmite de’it ba malu iha siénsia maibé mós atu bele komprometidu iha serbisu sosiál no eziste hodi bele serbí mós iha komunidade no Igreja,” dehan reitór ISFIT.
Iha fatin hanesan, dosente dekanu filozofia UNTL, Nicolau Borromeu, hato’o agradese ba realizasaun nota de entendimentu ne’e no nia konsidera kooperasaun ne’e importante tebes tanba ba oin bele serbisu hamutuk hodi kompleta malu di’ak liu tan iha área Filozofia nian.
“Ami kontente no agradese tebes tanba bele halo ona kooperasaun diak ISFIT no liu husi kooperasaun ne’e ami bele asesu mós iha prosesu formasaun ba futuru jerasaun Igreja nian no ida seluk parseria ida ne’ebé bele hasa’e kualidade iha área akadémika hodi hatán ba rekizitu sira avaliasaun institusionál nian,” deklara nia.
2,410 total views, 6 views today
Bele hare Video Seluk :