DILI (timorpost.com)—Prezidente Partidu Frente Revolusionáriu Timor-Leste Independente (FRETILIN), garantia sei hetan kadeira hamutuk 40 iha Eleisaun Parlamentár 2023, nune’e bele forma nonu Governu.
Hafoin ezerse direitu votu iha Sentru Votasaun Faról Dili, lideransa troika partidu istóriku ne’e garantia atu manan maioria iha munisípiu 13, inklui Rejiaun Administrativa Espesiál Oe-kusi Ambenu (RAEOA).
“Buat hothotu ami ko’alia tiha ona iha kampaíña, naturalmente ami hakarak bele lori FRETILIN ba vitória, ha’u garantia munisípiu hothotu manan maioria,” nia informa hafoin ezerse direitu votu iha Sentru Votasaun Faról, Domingu (21/05/2023).
Tanba plataforma entendimentu ne’ebé kompostu hosi partidu Frente Revolusionáriu Timor-Leste Independente (FRETILIN), Partidu Libertasaun Popular (PLP) no Kmanek Haburas Unidade Nasionál Timor Oan (KHUNTO) sei forma nonu governu.
Partidu istóriku ne’e hatudu ona ninia kapasidade atu mantein pás no estabilidade, nune’e ema hothotu bele hakmatek iha rai ida ne’e. Tanba ne’e, nia husu ba sidadaun hothotu atu bele hakat ba sentru votasaun, hodi ezerse ida-ida ninia direitu votu iha eleisaun ne’e.
Iha terenu jornalista Timor Post observa katak, votante foun na’in-rua husi Prezidente Partidu FRETILIN Francisco Guterres ‘Lu Olo’, ninia oan mane na’in-rua ho naran Olokay ho Eldino mós hahú ezerse ona sira-nia votu.
“Ita iha tan votante foun na’in-rua (Olokay ho Eldino), ne’ebé foin primeira vés ezerse sira-nia votu iha Eleisaun Parlamentár, sira na’in-rua votante foun”, nia hateten.
Lideransa troika ne’e hetan akompaña másimu hosi ninia espoza rasik, Cidália Nobre Guterres, nune’e mós oan mane na’in-rua Olokay ho Eldino, hakat ba Sentru Votasaun iha Faról, Suku Motaél, Postu Administrativu Vera Krús, munisípiu Dili.
7,913 total views, 3 views today
Bele hare Video Seluk :
Subscribe to Timorpost
