Dili (timorpost.com)—Atividade negosiu Ilegál tantu iha tasi no rai-maran ne’ebe akontese beibeik ikus dezenvolve an sai krime organizadu ona, tenke atende ho organizadu la’ós ba de’it Unidade Polísia Maritima de’it, maibé presiza kontrola integrada.
Informasaun hirak ne’e Diretór Ezekutivu Fundasaun Mahein, Nelson Belo, informa ba jornalista sira iha nia kna’ar fatin edifisiu FM, Bairru Grilos, Tersa, (01/08).
“Se ita dehan atividade negosiu ilegál akontese beibeik ona, ne’e katak krime ne’e dezenvolve an sai krime organizadu ona, se krime organizadu krime ida ne’ebé matenek, nia haree ba ita nia frakeza maka foin bele halo aktu sira ne’e, entaun atu atende sira estadu tenke organizadu, atendenmentu sira ne’e la’ós ba de’it Unidade Polísia Maritima (UPM) de’it, más tenke haforsa kooperasaun bilateral, komunika sira para iha operasaun integrada”, Diretór Ezekutivu FM, Nelson, informa.
Nelson hatete, maski durante ne’e ita halo ona kooperasaun integrada, sira nasaun viziñus sira halo operasaun, Timor-Leste mós halo operasaun más ita mós tenke iha koordenasaun internal instituisaun estadu relevante sira iha rai laran atu informasaun ba malu.
Nia subliña, durante ne’e la’o ona balu maibé, seidauk sertu tanba asuntu boot ida atu bele haforsa sira nia kna’ar kontrolu ida integradu maka tenke kria ona politika seguransa nasional atu haforsa ne’e seidauk la’o di’ak.
“Ita tenke haree fila fali polítika seguransa nasionál ne’e, ne’ebé Polítika ne’e mukit ita nia atuasaun iha terenu ne’e mós mukit, se politika ne’e forsa ita nia atuasaun iha terenu ne’e mós forsa”, katak Diretór FM, Nelson.
Tanba tuir FM nia observasaun husi relatoriu sira ne’ebé Ministeriu Agrikultor fó sai katak kada tinan riku soin sira iha tasi laran lakon ho valor osan millaun ba millaun, ne’e hatudu katak vizilansia iha tasi laran sei fraku.
Aleinde ne’e atividade negosiu ilegal sira hanesan mina, sigaru, ikan no atividade negosiu ki’ik ilegál ne’e presiza iha polítika ida maka gia, más ida ne’e maka laiha susar atu identifika ameasa mai husi liur ne’e saida?.
Entaun pelumenus iha politika ne’e aviza ba autoridade kompetente sira halo preparasaun la’o tuir ida ne’e, se lae ameasa ne’e mai boot maibé preparasaun autoridade kompetente sira uitoan liu entaun laiha ballansu entre preparasaun ho demanda ne’ebé maka iha.(*)
1,764 total views, 3 views today
Bele hare Video Seluk :
Subscribe to Timorpost
