DILI (timorpost.com) – Reprezentante komunidade iha suku Lahane Oriental, Francisco Soares Guterres, husu ba governu foun atu kontinua implementa programa Uma Naroman ba Povu (UNP) iha territóriu laran tomak.
“Ami hanesan povu, ami la husu buat ida maibé ami husu de’it ba governu foun mai ukun tinan liman ne’e se bele kontinua implementa programa Uma Naroman ba Povu iha territóriu laran tomak,” reprezentante komunidade suku Lahane Oriental, Francisco Soares Guterres, hateten ba Timor Post iha sede suku Lahane Oriental Taibesi, Kinta (25/05).
Nia dehan, Governu tenke kontinua program UNP atu nune’e komunidade ne’ebé moris vulneravel no laiha osan atu harii uma ho dignu ne’e bele hela, maibé ho programa UNP bele tulun no bele fasilita komunidade sira nia fatin ho seguru atu nune’e iha tempu udan labele fó ameasa ba sira nia vida.
Tuir nia, programa UNP ba povu ne’e di’ak tanba governu oferese material hodi halo konstrusaun ba komunidade nia uma kompleta ho fasilidade hanesan dapur, hariis fatin no sintina.
Aleinde ne’e, UNP plus B nian ne’e governu oferese mós kalén ba komunidade hodi troka sira nia kalén aat para troka fali kalén foun hodi nune’e tempu udan boot labele kona sira nia sasán iha uma laran.
Tanba ne’e mak nia husu ba governu foun atu kontinua nafatin programa UNP ba povu hodi nune’e povu sira ne’ebé seidauk hetan oportunidade Uma Naroman ba Povu karik sira bele hetan hotu hodi nune’e iha tempu udan sira bele hela iha fatin seguru.
Nune’e mós, administradór postu Na’in Feto, Hermínia Martins, hatete nia parte husu ba governu foun atu implementa nafatin program UNP iha territóriu laran tomak atu nune’e bele fasilita xefe família ne’ebé laiha kbiit atu harii uma ba sira hodi hela.
Maibé ho programa UNP ida ne’e bele tulun ona sira hela iha fatin seguru hodi buka moris no buka servisu hodi hetan osan atu bele sustenta ba nesesidade família nian.
2,718 total views, 3 views today
Bele hare Video Seluk :
Subscribe to Timorpost
