Baukau(timorpost.com)— Governu liuhosi Ministériu Administrasaun Estatál (MAE) Reprezenta Prezidente Autoridade Munisípiu Baukau lansa fatuk dahuluk ba konstrusaun sede suku Builai, postu administrative Baukau Villa, munisípiu Baukau, ne’ebé mak hetan ona legalidade bazeia ba diploma ministerial 19/2023.
Reprezentante Ministru Administrasaun Estatál, atuál Presidente Autoridade Munisípiu Baukau, Olivio Freitas, iha serimónia lansamentu fatuk dahuluk ba konstrusaun sede suku Builai, nu’udar pasu importánsia hosi harii sede suku foun atu lori besik programa governu nian ba komunidade liu-liu liga ba setór dezenvolvimentu.
“Objetivu harii suku foun atu lori besik dezenvolvimentu ba ita nia povu, tanba durante ne’e suku Buibau iha area luan populasaun mós barak, tanba ne’e governu buka solusaun hodi harii suku foun ho estabilidade no pás”, dehan PAM Baukau, Olivio Freitas, ba Timor Post, hafoin remata lansamentu fatuk dahuluk konstrusaun sede suku foun Builai, Kuarta (07/06,2023).
Nia esplika, haree ba realidade ne’ebé durante ne’e populasaun sira hosi suku Buibau enfrenta problema distánsia no atendimentu ne’ebé ladún iguál halo komunidade hosi aldeia Buile, Samalakuliba, Alala no Manulai hato’o proposta liuhosi postu administrative no munisípiu ikus mai hetan aprova hosi Ministériu Administrasaun Estatál konsege konkretiza estabelese suku foun.
Iha fatin hanesan, Diretór Jerál Dezenvolvimentu Rural, Ministériu Administrasaun Estatál, Rozito Guterres hatete, planu harii sede suku foun bazeia ba diploma ministerial némeru 19/2023 iha loron 3 fulan Maiu, segundu alterasaun diploma ministerial númeru 16/2017 iha loron 31 Marsu rekoñese suku no aldeia tama iha vigor iha loron 1fulan Outubru 2023.
Nia afirma, objetivu governu harii suku foun, la’ós atu haketak komunidade no la’ós haketak kultura tradisionál entre feto san umane no suku Builai hetan oportunidade sai suku, tanba la kontradis ho baze lega sira ne’ebé ministériu iha.
“Objetivu harii suku foun ne’e la’ós atu haketak entre komunidade suku Buibau ho suku foun Builai la’ós haketak feto san ho umane, tanba sá durante ne’e proposta barak hosi Timor laran hakarak harii suku foun konsege realiza, tanba prienxe”, nia haktuir.
Entretantu presidente komisaun instaladora suku foun Builai, Domingos António Fraga hatete, prosesu harii tinan ida resin liuhosi enkontru lubuk ida ho intelektuál, veteranu, lia na’in no komunidade hodi ko’alia kona-ba naran suku no fatin harii sede suku.
Nia esplika, hanesan komisaun instaladora agradese ba governu liuhosi ministériu administrasaun estatál tanba konsidera populasaun aldeia haat nian proposta hodi estabelese suku foun.
“Primeira enkontru hodi halo komprovativa lista prezensa, iha segundu enkontru ami realiza iha loron 15 fulan Janeiru 2022 ne’e ko’alia kona-ba naran suku no fatin harii sede suku foun”, dehan Domingos.
Suku Builai kompostu hosi aldeia haat hanesan aldeia Buile,Samalakuliba, Alala no Manulai ho nia total xefe família 557 ho total populasaun 1678.
Hakarak informa katak aldeia haat ne’ebé haketak-an hodi harii suku foun antes ne’e hola parte ba suku Buibau, postu administrativu Baukau Vila.
872 total views, 6 views today
