DILI, (timorpost.com)— Hospitál Nasionál Guidu Valadares (HNGV) selebra loron mundiál ba ema moras ba dala-32, ne’ebé realiza iha HNGV ho tema “Não é Conveniente que o Homen Esteja Só (Gn 2,18 ), Cuidar do Doente, Cuidando das relações”.
Iha serimónia selebrasaun ne’e, Vise Ministra Saúde, José dos Reis Magno, hatete, pesoál saúde sira oferese tratamentu saúde ba pasiente sira tenke nakonu ho domin, atu nune’e komunidade bele sente no kontenti ho tratamentu ne’ebé iha.
“Kuidadu saúde ne’ebé mak presiza oferese ba iha moras sira liuliu ba família sira tenke ho com paixão intermoral, ne’e hatudu katak kuidadu saúde sira hotu ne’ebé oferese tenke ho penuh kasih sayang dan kelembutang, ne’e la’os buat foun ida ba profesionál saúde sira, buat balun ita halo ona. Tanba ne’e Hospitál Nasionál Guidu Valadares, sei hamriik hela maibé ezijénsia ba ema sira ne’ebé mak hetan tratamentu iha hospitál kontinua ezije ba profisionál saúde sira atu mantein nafatin servisu tomak”, Vise Ministra Saúde, José dos Reis Magno, informa ba jornalista sira iha HNGV, Tersa, (13/02).
Nia hatutan “Ita sempre prontu atu nune’e bele oferese ita-nia kuidadu saúde sira ne’ebé mak sira presiza iha nível hotu-hotu, tanba ne’e Ministériu Saúde ezije nafatin atu ba oin tenke servisu ho ekipa atu nune’e kuidadu saúde sira ne’ebé mak oferese bele di’ak liután”.
Iha fatin hanesan Diretora ezekutiva HNGV, Cecilia Barros Mendonça, ho tema ba selebrasaun ne’e hatudu katak ema ida sei la konfortavel bainhira nia moris mesak maibé presiza ema seluk nia hamaluk.
“Nu’udar pesoál saúde katak prezensa ne’ebé importante tebes ba moras sira no pasiente sira ne’ebé iha HNGV, moras sira presiza tebes akompañamentu husi saúde ne’ebé mais ou menus atu fó kuidadu ne’ebé di’ak, seguru no kualidade, núnka atu husik moras ida mesak, tulun sira ho fuan ho domin atu sira sente katak ita-nia prezensa ne’e folin liu ba sira, duke ai-moruk ekipamentu ne’ebé mak avansadu”, Doutora, Cecilia Barros Mendonça, akresenta.
Nia hatutan “Ha’u agradese ba médiku espesialista, médiku jerál sira, enfermeiru no enfermeira, parteira sira no seluk tan, ba imi hotu nia servisu di’ak, ne’ebé hatudu katak pasiente barak mak hetan ona salvasaun husi HNGV maske sei infrenta limitasaun barak”.
Entretantu, Presidente Komisaun Organizadora ba Selebrasaun ne’e, Dra. Ana Maria P. Magno, informa, selebrasaun ne’e tuir loloos hala’o tiha ona iha loron 11 fulan-Feveréiru liubá maibé tanba razaun tékmika mak foin realiza hikas ohin, ne’ebé refere ba mensajen husi Sua Eselénsia Papa Fransisco, iha loron mundiál ema moras ba dala-32 iha tinan 2024 ho tema “Não é Conveniente que o Homen Esteja Só (Gn 2,18 ), Cuidar do Doente, Cuidando das relações”.
Selebrasaun loron mundiál ba ema moras iha tinan ida-ne’e hetan alokasaun husi Orsamentu Jerál Estadu (OJE) 2024 ho montante rihun $4.496,50 USD, husi orsamentu ne’e aloka ba misa eukaristia, fahe presente ba moras sira no seluk tan.
Serimónia ne’e partisipa direita husi Vise Ministra Saúde, Amu Vigáriu Dioseze Dili, Amu Kapelaun HNGV, Komandante Jerál PNTL, funsionáriu HNGV, inklui konvidadu sira seluk.(*)
2,742 total views, 3 views today
Bele hare Video Seluk :
Subscribe to Timorpost
