DILI, (timorpost.com)— Bankada FRETILIN iha Parlamentu Nasionál solidariza no husu liberta emediatamente profesór kontratadu na’in-10 ho ativista na’in-4 ne’ebé detein iha sela Polísia Nasionál Timor-Leste (PNTL) iha loron 12 fulan-Fevereiru 2024.
“Bankada FRETILIN konsidera detensaun ne’ebé PNTL halo iha loron 12 Fevereiru 2024 laiha fundamentu tanba profesór kontratatu ezije sira-nia direitu tuir Konstituisaun RDTL artigu 50, direitu ba servisu “Sidadaun hotu-hotu feto ka mane, iha direitu no devér atu halo servisu no livre atu hili nia profisaun”, hateten Deputadu Bankada FRETILIN, David Dias Ximenes “Mandati” liuhosi deklarasaun ne’ebé Timor Post asesu iha Tersa, (13/02).
Nia hatutan, artigu 42 Konstituisaun RDTL garante liberdade reuniaun no manifestasaun nian, iha aliña primeiru, iha garantia liberdade ba ema hotu-hotu ne’ebé hakarak halo reuniaun iha pàs no la kaer kro’at, no sira lalika husu uluk autorizasaun.
Maibé Ministra Edukasaun, Dulce de Jesus Soares, taka portaun ba profesór kontratadu sira ne’ebé hakarak ko’alia ho Ministra Edukasaun kona-ba sira nia problema, Ministra Edukasaun hatudu de’it nia inkapsidade no laiha vontade di’ak atu rezolve problema ne’ebé profesór kontratadu sira infrenta.
“Desizaun Ministériu Edukasaun ne’ebé la purdente no kuidadu afeta maka’as ba funsionamentu iha prosesu aprendizagen iha eskola hotu, no viola direitu estudante barak ne’ebé konsagra iha Konstitusaun RDTL artigu 59 ko’alia kona-ba edukasaun no kultura katak, Estadu rekoñese no garante sidadaun hotu-hotu nia direitu ba edukasaun no kultura, nune’e mós harii sistema ensiñu báziku universál , obrigatóriu no bainhira bele, saugate, tuir lei haruka”, nia salienta.
Tanba ne’e, dala ida tan, bankada FRETILIN ezije Ministériu Edukasaun rezolve problema profesór kontratadu sira , inklui liberta emiditamente profesór na’in-10 inklui ativista na’in-4 ne’ebé detein hela iha sela PNTL Munisípiu Dili.(*)
1,203 total views, 3 views today
Bele hare Video Seluk :
Subscribe to Timorpost
