DILI, (timorpost.com)— Governu liuhosi Sekretáriu Estadu Ensiñu Sekundáriu Jerál no Ensiñu Sekundáriu Téknik Vokasionál (SEESJ no ESTV), Domingos Lopes Lemos, enkontru ho ajénsia Organizasaun Internasionál Traballu (ILO, sígla Inglés), hodi ko’alia kona-ba apoiu ILO nia ba Eskola tékniku Vokasional (ETV) sira liuliu fó formasaun ba profesór sira.
Kona-ba formasaun ne’e Sekretáriu Estadu SEESJ no ESTV informa ba parte ILO maibé ILO resposta katak prontu no iha tempu badak bele realiza formasaun ne’e, maske nune’e, sei iha faze diskusaun kle’an antes implementa.
“Ami sei iha faze diskusaun nia-laran fó formasaun ba profesór sira tranzmite ba sira ou direitamente ekipa ba eskola sira maibé ida-ne’e sei iha faze diskusaun nia-laran no área ida ne’ebé mak sira atu fó formasaun ne’e sei iha diskute nia-laran. Tuir sira-nia identifikasaun ne’ebé sira lori mai, iha tékniku vokasionál 4, tékniku vokasionál agríkola ne’ebé mak foin lalais Ministériu Agrikultura transferénsia mai iha ministeiru edukasaun nian ne’e”, Sekretáriu Estadu, Domingos Lopes Lemos, informa ba jornalista sira iha nia servisu fatin ME, Vila-Verde, Tersa, (13/02).
Nia hatutan, “Ami mós informa ba sira katak ami mós identifika eskola tékniku vokasionál sira seluk, ida ne’ebé mak nia departamentu hola parte iha agrikultura ne’e pois ita sei ba aprezenta ba sira hanesan, Eskola Tékniku Vokasionál agrikultura iha Maliana- Bobonaru, ida iha Oekusi, Manatuto-Natarbora, Lautem –Lospalos iha Fuilor nian”.
Iha fatin hanesan, reprezentante ILO, Tendy Gunawan, informa, projetu ne’e hetan apoiu husi Uniaun Europeia iha Timor-Leste, tanba ne’e iha enkontru ne’e ILO aprezenta ba Sekretáriu Estadu kona-ba apoiu ne’ebé ILO bele halo liuliu ba Eskola Tékniku Vokasionál sira iha Timor laran tomak.
“Objetivu ida-ne’e mak atu apresenta kona-ba projetu programa ba tinan 4, ba durasaun tinan haat ne’e atu identifika oins’a tuir kolaborasaun ka servisu hamutuk ho parte edukasaun nian, liuliu hasa’e koñesimentu ka kapasitasaun estudante no profesor sira. Ita hotu hatene katak ILO ne’e hanesan organizasuan ida ne’ebé mak ONU nia okos, halai liu ba traballu, iha ILO mós presiza servisu hamutuk ho institusaun ka ministériu relevante atu hasa’e kapasidade ka koñesimentu estudante ka profesór sira”. Tendy Gunawan, informa.
Iha enkontru ne’e partisipa mós husi Diretór no tékniku sira husi Sekretáriu Estadu no ILO.(*)
3,615 total views, 3 views today
Bele hare Video Seluk :
Subscribe to Timorpost
