DILI (timorpost.com) — Tanba públika kestiona manipulasaun valor Ezame Nasionál (EN), nune’e Sosiedade Sivíl Timor-Leste Coalition For Education (TLCE), deskonfia Diretór eskola balun fó bolsa méritu ba nia família.
Diretór Ezekutivu TLCE, Jose Monteiro, hatete kona-ba atribuisaun bolsa méritu ba estudante klasifikadu iha territóriu nasionál kontinua atribui, maibé presiza hadi’a kondisaun ba programa ne’e. Karik tinan oin mai labele mosu diskriminasaun.
“Ha’u mós deskonfia Diretór balun fó ba sira-nia família de’it, maibé ne’e de’it la to’o atu hapara programa ida ne’ebé fó benefísiu ba estudante sira no ba dezenvolvimentu edukasaun”, nia hateten ba Timor Post via-WhatsApp, Kinta (02/02).
Nune’e, nia parte husu Ministériu Edukasaun, Juventude no Desportu (MEJD), presiza halo suspensaun temporária ba Diretór eskola sira ne’ebé falsifika valor ba estudante sira, se lae hahalok ne’e kontinua nafatin, oinsá atu dezenvolve edukasaun iha futuru.
Tanba ne’e, MEJD labele tuur iha fatin de’it, tenke tuun halo verifikasaun ba hahalok pesoál ida ne’ebé halo manipulasaun valor ne’e, atu nune’e halo investigasaun labele jeneraliza ba manorin hotu.
Nia dehan, iha esteitmentu oi-oin, inklui diretiva MEJD nian, maibé TLCE seidauk haree rasik, nune’e TLCE lakohi halo espekulasaun. Ho nune’e TLCE konfia no tau fiar ba diretiva eskola nian no manorin hotu-hotu.
“Tenke konfirma estetmentu públiku ne’ebé daudaun la’o katak iha indísiu, TLCE seidauk haree ida ne’e”, katak nia.
Tanba ne’e, diretiva MEJD nian tenke halo uluk investigasaun molok halo esteitmentu públiku. MEJD tenke assume responsabilidade professional hodi esklarese ho faktu ne’ebé mosu, ne’e duni hahalok falsifikasaun valor iha eskola balun ka eskola hotu-hotu, husi professor ida ka professor hotu.
4,975 total views, 3 views today
Bele hare Video Seluk :
Subscribe to Timorpost
