DILI (timorpost.com) – Ministériu Edukasaun (ME) liuhusi Sekretáriu Estadu Ensinu Tékniku Vokasionál husu ba profesór eskola ensinu pre-eskolár to’o ensinu sekundária tantu privadu no públiku tenke orienta estudante sira hodi bele partisipa iha loron proklamasaun nian.
Sekretáriu Estadu Ensinu Tékniku Vokasionál, Domingos Lopes Lemos, hatete, profesór sira presiza orienta estudante sira hodi partisipa iha loron nasionál hanesan 20 de Maiu, loron proklamasaun 28 de Novembru, loron 30 de Agostu no loron nasionál sira seluk ne’ebé importante.
“Ita husu ba diretór no profesór eskola hotu iha territóriu laran tomak atu orienta estudante hotu-hotu hodi partisipa loron nasionál ne’e importante, hanesan Timoroan tenke partisipa hodi hatene istória pasadu nian ne’ebé eroi sira terus,” Governante ne’e hateten Timor Post hafoin asina MoU ho kompañia Samsung iha Manleuana, Sesta (24/11)
Membru governu ne’e relata, tuir loloos loron importante sira hanesan ne’e la presiza fó karta sirkulár ba eskola ida-idak, maibé profesór sira iha obrigasaun orienta estudante hodi partisipa iha loron nasionál sira ne’e.
Nia dehan, la’ós loron nasionál, estudante no profesór sira uza fali loron ferias nian hodi deskansa iha uma, no halo atividade privadu hodi la partisipa iha loron importante sira ne’e no ikus mai estudante barak la hatene istória Timor nian.
Tanba ne’e mak iha tinan 2022, ME sei hasai sirkulár ida hodi hato’o ba eskola hotu-hotu iha territóriu laran tomak iha loron nasionál estudante labele toba ka halimar iha uma maibé, sira tenke partisipa másimu iha loron importante hirak ne’e.
Antes ne’e, Segundu Vise Primeiru-Ministru, Ministru Koordenadór Asuntu Dezenvolvimentu Rural, Mariano Assanami Sabino, preokupa ho estudante sira la partisipa iha reflesaun ba loron 12 Novembru.
Assanami husu ba Ministra Edukasaun no Ministru Ensinu Superior, Siénsia no Kultura atu, ba oin, organiza estudante to’o ensinu superior atu partisipa.
“Loron 12 Novembru la’ós atu feriadu hela iha uma. Loron importante ne’e atu ema hotu mai hamutuk, misa, selebra, hanoin fila fali. Ita ko’alia beibeik formasaun karakter, maibé ita la fó importánsia hirak ne’ebé importante,” Assanami hato’o preokupasaun hirak ne’e, iha ámbitu Selebrasaun 12 Novembru iha Santa Cruz, Domingu (12/11).
Governante ne’e afirma katak, loron hirak ne’ebé importante hanesan 12 Novembru, 28 Novembru, 20 Agostu no 30 Agostu, loron boot sira, Ministériu Edukasaun (ME) halo estudante feriadu, joven sira ba pasiar tiha, la fó importánsia ba loron boot sira ne’e.
“Ha’u sei orienta katak hahú ohin ba oin, selebrasaun sira la’ós atu halo feriadu ba estudante no joven sira ba pasiar tiha la mai eskola, maibé iha ida-idak nia fatin eskola no iha fatin hirak ne’ebé públiku tenke partisipa. Ohin ita selebra halo reflesaun hanoin hikas dala ida tan ho restu mortais 12 Novembru ne’ebé mak ita seidauk konsege halibur,” Assanami ko’alia.
Tuir nia, 12 Novembru simboliza totalidade juventude ne’ebé entrega-an ba rai ida ne’e atu hetan liberdade ukun rasik an.
Iha komemorasaun ne’e Assanami hato’o mós preokupasaun ba joven sira ne’ebé kontinua hala’o violensia nudar hahalok ne’ebé halo traisaun ba eroi sira nia luta.
“Iha rai lulik ida ne’e laiha ema ida mak satan ema-nia liberdade, laiha ema ida mak bele sobu ema nia liberdade, laiha ema ida mak mai tan sunu ema nia uma, mai halo violensia, ne’e halo traisaun ba eroi sira, tanba sira sosa liberdade ho fakar ran mak foin hetan,” hateten Assanami.
Nia hatutan katak eroi sira nia mate mak fó liberdade total ba joven sira nia futuru. Tanba ne’e, presiza tane aas liberdade ne’e hodi luta ba dezenvolvimentu Timor-Leste nian iha futuru.
“Sira nia mate sosa ita-nia liberdade, sira-nia mate atu fó ezemplu ida, atu fó mós mensajen katak ita bele partidu oioin, organizasaun oioin maibé organizasaun no partidu labele sobu ita-nia unidade ba estadu ida ne’e. Unidade atu hodi Timor ba oin, Timor ida ne’ebé fó is moris ba ita, no ita mate sei fila ba rai ida ne’e. Ita tenke unidade para foti sa’e nafatin Timor ne’e ba oin,” hateten nia.
Nia akresenta, situasaun ne’e mak relevante hodi juventude jerasaun foun sira atu hanoin hikas sira ne’ebé fó vida ba rai no povu ida atu ukun rasik an.
“Tanba ne’e, ba ha’u-nia alin sira no joven sira ohin imi livre, imi la’o ba mai, imi bele aprende di’ak liu tán, ne’e tanba imi nia maun sira mate, imi nia aman sira mate, imi nia avo sira mate ba ukun rasik an ne’e,” nia hateten.
3,611 total views, 3 views today
Bele hare Video Seluk :
Subscribe to Timorpost
