DILI (timorpost.com)—Tinan 2022 to’o 2023, Organizasaun Noun Governamentál Saúde Ba Ema Hotu (SABEH), hala’o programa saúde eskola no halo tratamentu ba estudante hamutuk 1.400 resin.
Tuir Diretór Ezekutivu Organizasaun Noun Governamentál, Saúde ba Ema Hotu (SABEH), Andre Belo, programa saúde eskolár ne’e importante tebes. Tanba komunidade barak hala’o atividade iha oras barak nia laran iha fatin tolu, mak família, servisu fatin no eskola.
Nune’e SABEH hala’o programa saúde eskolár iha eskola balun iha Timor Leste, dezde tinan 2018. Maibé governu liuhosi Ministériu Edukasaun no Ministériu Saúde, seidauk kontrola másimu estudante sira.
Alende ne’e, kada tinan, númeru defisiente aumenta, mak ONG SABEH hala’o programa espesiál ba defisiénsia sira iha tinan 2022.
“Foin daudauk ami finaliza saúde eskolár iha eskola Ediri Maubara, Likisá. No mós eskola 12 Outubru Tasi Tolu, Dili, ami screening halo tratamentu ba estudante sira hamutuk 1.400 resin,” Diretór Ezekutivu SABEH, Andre Belo, ba Jornalista iha knaar fatin Kaikoli, Kuarta-Feira (20/09/2023).
Husi númeru ne’e, SABEH identifika moras maioria mai husi Infesaun respiratóriu (ISPA), nehan kuak, moras kulit no mal-nutrisaun. Maibé SABEH halo kolaborasaun ho sentru saúde no postu saúde, hodi halo tratamentu ho di’ak.
Diretór ne’e hatete, ba futuru sei kontinua implementa iha eskola sira iha territóriu laran tomak, liuliu area rural sira ne’ebé dook hosi fasilidade saúde.
735 total views, 6 views today
Bele hare Video Seluk :
Subscribe to Timorpost
