DILI (timorpost.com)—Ministériu Ensinu Superior Siénsia no Kultura (MESSK) sei aloka orsamentu millaun lima husi orsamentu OJE 2024 ba ensinu superior privada sira ne’ebe mak eziste iha Timor-Leste. Hafoin propoin ba Komité Revizaun Orsamentu OJE 2024 ho montante dollar Amerikanu millaun sia.
Tuir Ministru Ensinu Superior Siénsia no Kultura (MESSK), José Honório da Conceição Jerónimo, hatete ida ne’e importante liu, tanba governu hakarak aposta ba kualidade, aban bain rua joven sira la’ós hotu-hotu hili mak Universidade Nasionál Timor Lorosa’e (UNTL) maibé iha alternativu bele hili tantu ensinu superior privadu no tékniku sira.
“Ohin mai aprezenta ba Komité Revizaun Orsamentu kona-ba orsamentu ministériu nian, orsamentu ne’ebé aloka ba ministériu iha millaun sia liu entaun, millaun lima uza hodi apoiu ba universidade privadu sira iha Timor leste no Institutu sira atu nune’e aposta ba kualidade iha futuru,” Nia haktuir ba Jornalista hafoin remata reuniaun ho Komité Revizaun Orsamentu ba OJE 2024 iha Ministériu Finansas Aitarak-laran, Tersa (24/10).
Ministru MESSK ne’e afirma, Orsamentu millaun lima ne’e sei halo komisaun Asesu Ensinu Superior (KAES) ida atu halo lansamentu no KAES rasik sei vizita ensinu superior tantu privadu no estadu sira foin bele apoiu.
“Ida ne’e importante liu, tanba governu hakarak aposta ba kualidade”.
MESSK iha prioridade programa haat hanesan, komisaun koordenadora, baze de dadus ba ensinu superior sira, sistema nasionál kualifikasaun maibé sei diskusaun ho SEFOPE hodi bele fó formasaun ba joven sira ne’ebé iha kompeténsia no kurríkulu ensinu superior sira.
Nia afirma tan, governu sei apoiu maibé Governu sei enkontru ho universidade privadu sira nune’e apoiu iha parte ne’ebé. Ida ne’e sei halo diskusaun.
Membru Governu ne’e hatete, MESSK la husu orsamentu adisional tanba osan ne’ebé aloka ne’e sufisiente atu hala’o servisu.
1,515 total views, 3 views today
Bele hare Video Seluk :