Dili (timorpost.com)—Media Timor Post la simu liafuan arguida ne’ebé mak Konsellu Imprensa Prega ba editora Santina da Costa Araújo iha momentu ne’ebá hanesan Xefe redasaun Interina.
Diretór Ezekutivu Timor Post, Jacob Ximenes, hatete, rajaun rejeita karta notifikasaun husi Konsellu Imprensa tanba husi parte redasaun halo ona direitu de resposta relasiona ho publikasaun notísia iha jornál diária Timor post, ne’ebé ho títulu “matan delek” ba Provedoria dos Direitu Umanus (PDHJ).
“Ohin Ami simu tan karta notifikasaun ida husi KI ne’ebé karta ne’e ami rejeita, tanba sente katak korrespondente ida ne’e ami responde tiha ona ba KI mais menus ba mai konta dala haat ona maibé ikus ne’e ami rejeita tanba KI nafatin mantein liafuan arguida ho ida ne’e hanoin KI sente situasaun ida ne’e todan bele prosesa liu dalan seluk”. Haktuir Diretór Ezekutiva Timor Post, Jacob Ximenes iha Edifísiu Timor Post, Segunda (18/03).
Diretór ne’e haktuir, prosesu ne’e presiza kontinua ba oin karik KI rasik la satis faz ho notísia ne’ebé Timor Post rasik hasai ona direitu da resposta ba PDHJ.
“Ami la simu liafuan arguida tanba ne’e presiza prosesa ba oin”. Dehan diretór.
Enkuantu advogadu ba Timor Post, Jose Alves da Costa Ramos hatutan, ita hanesan ema legal hare ninia sirkunstánsia halo ona husi parte Timor Post hanesan ekipa jurídika iha Timor post halo ona kontestu hodi aplikasaun ida ne’ebé mak hodi kontestu ba sansaun ne’ebé mak KI imputa ba Eis Xefe Redasaun Timor Post nian.
“Ita la aseita ho liafuan ida ne’ebé la’ós kompeténsia Konsellu Imprensa nian, mais sira halo analojia atu imputa arguida ne’e iha kódigu prosesu penal hatete ema ida hetan liafuan arguida ema ne’ebé hasoru akuzasaun iha prosesu penal iha artigu 59 ne’ebé ko’alia kona ba kódigu prosesu penal”. Haktuir advogadu Timor Post.
Advogadu ne’e haktuir, iha mós lei komunikasaun kódigu étika jornalista nian la mensiona atu ekipa avaliasaun ida ne’ebé mak KI atu imputa liafuan Arguida ba Eis Xefe Redasaun Timor post nian, ho ida ne’e mak kontesta sira nia karta notifikasaun ba Arguida hodi konstitui ba Eis Xefe Redasaun Santida da Costa Araújo hanesan Arguida.
“Ita la kontra prosesu adverténsia rekizitada ne’e maibé liafuan sira ne’ebé hato’o husi KI hakerek iha ne’ebá mak ho Fundasaun ne’ebé analojia tanba ida ne’e mak ita kontesta, maibé koko atu hadi’a situasaun balun hanesan ekipa Timor Post hato’o liu husi kontestasaun”.
Maibé ohin karta notifikasaun mai tan, no ekipa Timor Post rejeita, tanba ne’e iha dalan ba oin atu hare prosesu kontinuidade ba oin ne’e oinsá.
“KI Sente la satis faz ho situasaun balun ita mós prontu hein sira atu lori ba prosesu tantu prosesu Sivíl la krime hanesan media ida ne’ebé mak Timor post iha naran no mós iha kreavilidade prontu hasoru situasaun saida de’it bainhira Konsellu Imprensa atu lori ba ne’ebé”.
KI la’ós Ministériu Públiku ou autór juridisial maibé nia hanesan sai mediadór de’it bainhira krime ruma mak akontese sira bele rekomenda halo keixa tuir nia dalan.
Aleinde ne’e eis Xefe Redasaun Santina da Costa Araújo mós hatutan, ha’u hanesan jornalista ida ne’ebé antigu entaun ha’u hare de’it no kolabora oinsá mak atu bele depois de resposta sira nia karta sira ne’e atu oinsá mak sira tau loloos bainhira hasai karta karik tenke iha esplikasaun los no tuir lei komunikasaun sosiál ne’ebé mak ou tuir regra sira ne’ebé Konsellu Imprensa aplika iha ne’ebá.
“Durante kolabora ha’u simu depois hare lee de’it maibé ohin ne’e ba dala tolu, senti katak labele simu ona karta ne’e no ha’u rejeita total ba karta ne’ebé mak sira lori mai, nafatin hakerek iha ne’ebá arguida Santina da Costa Araújo”.
Konsellu imprensa ne’e sai mediadór ba media sira bainhira jornalista ida ou editor ida halo sala, sira sai mediadór hodi bolu jornalista ne’e ho ema ne’ebé mak vítima atu buka solusaun.
“Tanba ne’e ami nia parte rejeita total, tanba KI la’ós Ministériu Públiku. Liafuan Arguidu ne’e bainhira ema halo sala tuir prosesu julgamentu iha Tribunal mak notifika hanesan arguida. Laos tur de’it foti liafuan arguida hodi tau ba ema ne’e ami rejeita total”. Hakotu.
4,044 total views, 3 views today
Bele hare Video Seluk :
Subscribe to Timorpost
