Manufahi(timorpost)—2024 Munisípiu Manufahi liuhosi Programa Nasionál Dezenvolvimentu Suku (PNDS), sei tau prioridade liu ba hadi’a estrada kuak sira iha area rurais, tanba iha ne’ebá susar asesu ba transporte.
Tersa 23/01) ne’e PNDS sosializasaun matadalan tinan 2024 ba autoridade postu administrativu haat no Xefe Suku 29 ho estrutura sira iha munisípiu Manufahi. Iha ámbitu sosializasaun refere, Prezidente Autoridade Munisípiu (PAM), Manufahi, Luis Marçal da Costa Tavares, aprezenta katak, ba tinan 2024, PNDS hakarak tau prioridade ba estrada iha area rurais.
“Ita tenke tau prioridade ba estrada, tanba suku sira iha rurais susar tebes asesu ba transporte liuliu karreta”, Marçal da Costa Tavares, hatete iha sosializasaun matadalan PNDS iha salaun Administrasaun Munisípiu Manufahi.
Tanba iha suku sira area rurais hanesan Lesuata, Fatukalo, postu administrativu Turiskai, suku Aituha, postu Alas, suku Fahinehan, Bubususu, postu Fatuberliu no suku sira seluk tan susar atu asesu ba karreta.
Maski iha problema bee moos, maibé tenke tau prioridade uluk ba estrada iha area rurais, tanba estrada laiha susar ba komunidade atu asesu ba merkadu.
“Ne’e duni presiza ita hotu-hotu tau hanoin hamutuk hodi atinje ita nia mehi ba moris di’ak sira iha Munisípiu Manufahi”, nia dehan.
Portantu durante ne’e, estrada no bee moos komunidade atu hetan mós sei lori tinan naruk nia laran, maski planu hosi munisípiu tau, maibé to’o ikus seidauk hetan solusaun.
“Karik komunidade la hetan estrada oinsá sira atu lori produtu asesu ba merkadu ne’e duni ba tinan ida ne’e tenke tau prioridade ba estrada rurais”, nia subliña.
Prezidente Autoridade ne’e, husu ba autoridade lokál, veteranu no seguransa atu kolabora hamutuk ho PNDS hodi mantein estabilidade no seguransa inklui atu atinje mehi ne’ebé iha.
987 total views, 3 views today
Bele hare Video Seluk :
Subscribe to Timorpost
