(Reportajen Jeremias Soares/Editor Mateus da Cruz)
DILI— Arsebispu Arkidioseze Metropolitana Dili, Don Virgílio do Carmo da Silva, apela ba kandidatu Prezidente Repúblika Francisco Guterres Lú Olo no Jose Manuel Ramos Horta, atu durante hala’o kampaña labele hakanek malu, sadik malu no hatún malu, nune’e labele fó influensia ba Povu ki’ik sira ne’ebé daudaun ne’e iha ambiente lulik semana santa Páskua.
“Husu ba kandidatu sira ne’ebé mak halo kampaña, katak iha ambiente sagradu no ambiente lulik semana santa nian ne’e, tenke kria ambiente di’ak ba Povu hothotu liuliu sarani sira, atu nune’e iha kampaña labele sai fali momentu sira ne’ebé ho liafuan hakanek malu, sadik malu, hatún malu, atu nune’e ita mós la influensia ita-nia Povu ki’ikoan sira iha loron boot ne’e”, nia apela bainhira inaugura Gruta UNDIL, iha Maskarenhas, Sábadu (02/04).
Arsebispu Arkidioseze Dili ne’e mós husu ba sarani sira atu hola konxiénsia no rai-an nu’udar sarani, atu la husik momentu grasa nian ne’e monu leet de’it.
“Ha’u husu ba Povu katóliku hotu, atu iha semana santa ne’e ita la husik liu de’it, tanba ida ne’e momentu dala ida de’it iha tinan ida nia laran, ita la husik tempu ne’e atu liu, maibé atu aproveita, liuliu atu konserva sakralidade, Sesta Feira santa ne’e ita hanoin kona-ba Maromak, ita tenke nonook, maibé kuandu sesta feira santa mak ita halo kampaña, ne’e dehan katak ita-nia hanoin kona-ba momentu lulik ida ne’e lakon tiha iha ita,”Don Virgílio fó hanoin.
714 total views, 3 views today
Bele hare Video Seluk :
Subscribe to Timorpost
