DILI (timorpost.com) – Portavóz Inséndiu Merkadu Taibesi, José Maubere, informa vítima Uma-Kain 53 sei la konkorda hodi hamamuk fatin akontesimentu ne’e.
Nia hatete, Governu hakarak hamamuk tenke hasai hotu komunidade iha fatin refere, labele indika de’it ba vítima ne’ebé hetan dezastre.
“Ami hetan dezastre mak dehan ne’e rai Estadu nian, maski la dehan ami hatene ne’e rai Estadu nian, la’ós loke fali kompania ka loja iha ne’e lae, ami mai buka moris, dehan atu hamamuk fatin ne’e ami sei presiza nafatin fatin ne’e hodi halo negósiu”, nia hateten ba Timor Post Online, Kuarta (28/12).
Nia dehan, se atu hamamuk fatin ne’e, tenke hasai hotu komunidade iha merkadu Taibesi, labele indika de’it ba vítima ne’ebé hetan dezastre, maibé ida ne’ebé la hetan dezastre nia hakmatek ne’e labele, hotu-hotu tenke sai husi fatin refere.
“Uza maneira ne’e atu hasai ami prontu, maibé hanesan sidadaun sente fuan moras, ami bele dehan tan rai ne’e ema hotu sakrifika nia aan, ohin loron ita goja no kontente”, katak nia.
José konta, uluk faan sasán iha merkadu lama, muda mai Hali-laran, depois mai fali Taibesi, to’o ikus atu hasai husi fatin ne’e, Povu la’ós bibi malae la’o tuir nia hakarak, Governu mak muda.
Nia afirma, ohin hasoru ona Prezidente Autoridade Munisípiu Dili, katak tenke husik fatin Inséndiu provizóriu, sasán ne’e hetan estraga labele book, PNTL dada fita mós labele book, vítima hotu-hotu prontu koopera ho Governu.
“Ami husu Prezidente Autoridade Munisípiu Dili, ami uza rasik ami-nia osan hodi hadi’a fali fatin ne’e, maibé laiha autorizasaun, maibé ami simu informasaun husi PAM katak agora loron boot, ne’ebé loron 05 Janeiru 2023 sira rasik mak sei orienta ekipamentu mai hodi halo konstrusaun”, dehan nia.
Portavóz ne’e hatete, bainhira laiha solusaun vítima sira sei ezije nafatin ba Governu ho tau matan, karik Governu promete mak la realiza sei tane nafatin nune’e hetan solusaun.
Iha sorin seluk Vítima Inséndiu Merkadu Taibesi, Vicente Venáncio, sente triste tanba lakon uma no mós sasán nesesidade bázika sira ahi han hotu, hanesan roupa, dokumentus balun.
Ho nune’e, depois Inséndiu parte Jestaun merkadu taibesi no mós PNTL sira dezloka kedas ba fatin seguru hodi hela provizóriu, tanba ne’e prezensa Governu liuhusi Ministériu relevante halo kedas intervensaun.
“Durante Inséndiu iha loron 22/12 husi Governu apoiu hahan, fos, lona, mina, toba fatin, no mós sasán nesesidade bázika sira seluk, inklui apoiu mós husi kompania balun, organizasaun sosiedade Sívil halo vítima sira sente kontente”, dehan nia.
Maibé, nia dehan, vítima barak mak sente triste daudaun ne’e hela provizóriu, depois laiha fatin atu bele hela, maski Governu no Estadu hatete katak, fatin area Inséndiu ne’e rai Estadu nian, tanba ne’e vítima sira triste ba fatin ne’ebé sira atu hela”, katak nia.
Nia haktuir, vítima sira kumpre katak, rai ne’e Estadu nian, maibé depois Inséndiu hanesan ne’e pelumenus Governu ka Estadu bele tau matan hodi buka fatin seluk ba vítima sira.
“Ami hatene rai Estadu nian, maibé sorte akontese Inséndiu hodi ahi han uma-kain 53 maka Governu foin hakfodak, maibé karik atu haruka ami sai tenke sai hotu labele husik ida hela”, nia dehan.
Nia hateten, Intervensaun husi Governu hodi apoiu hahan, fos nesesidade bázika ba vítima sira, maibé to’o agora seidauk iha informasaun ruma husi Governu atu apoiu material kontrusaun hodi halo uma ka fasilita hela fatin seidauk iha informasaun.
“Autoridade Munisipiu Dili, hatete ami fasilita imi hela provizoriamente iha ne’e durante loron tolu, hodi apoiu hahan ba imi, depois imi liu tiha loron tolu imi tenke buka fatin seluk hodi hela, maibé ami atu buka fatin ne’e ba los ne’ebé”, tenik nia.
Nia relata, fatin merkadu taibesi komunidade barak hela hodi hala’o negósiu, balun eskola, maibé ho Inséndiu hanesan ne’e atu hela lolos iha ne’ebé, tanba seidauk rona informasaun ruma husi Governu fasilita fatin ba vítima inséndiu sira.
“Ami maka buka rasik fatin, sira la fasilita, ami hanesan vítima sente triste ho liafuan ne’e Autoridade Munisípiu Dili, ko’alia tanba komunidade sai vítima ba inséndiu ne’e, maibé sira la buka fatin”, nia kestiona.
Enkuante, iha fatin provizoriamente ne’ebé vítima sira hela ba daudaun ne’e, bee moos ba nesesidade vítima sira nian sufisiente hela, tanba hafoin dezloka vítima ba fatin provizoriamente husi parte bombeirus fasilita bee kada loron.
Nia konta, depois inséndiu husi parte saúde nian mai halo kedas konsulta ba vítima sira tantu husi labarik bebé no mós to’o ema bo’ot sira.
1,177 total views, 3 views today
