DILI (timorpost.com)—Estadu Unidu Amérika (EUA) liuhosi nia-Ajénsia ba Dezenvolvimentu Internasionál (USAlD, sigla inglés), ho parseria Ajénsia Dexis apoiu fundu millaun $ 7.9U, ba programa foun ne’ebé kria ho naran “Hametin Demokrasia Luta Kontra Korrupsaun iha Timor-Leste”.
Liuhosi diskursu Enkarregadu Negósiu Embaixada Amérika, Iha Timor-Leste, Marc A. Weinstock, hatete, programa ho ninia atividade foun maka “Mekanizmu Akuntabilidade no Integridade,” koñesidu ho naran AIM, foka ba promosaun ba responsabilizasaun no reforma anti-korrupsaun iha Timor-Leste.
“Programa ho durasaun tinan tolu. USAID, investe ho orsamentu millaun 7.9U$, hodi implementa husi Grupu Konsultoria Dexis, hakarak hametin instituisaun sira no sistema demokrátiku nasaun ne’e nian atu Timor-Leste inkluzivu, prósperu, no saudavel,” Dehan Enkarregadu Negósiu Embaixada Amérika, Marc A. Weinstock, hafoin lansa programa hametin demokrasia luta konta Korrupsaun iha Timor-Leste Tersa (30/04).
Marc A. Weinstock, dehan, ho fundu ne’ebé Estadu EUA fasilita fiar katak iha forsa responsabilidade no transparénsia nian atu harii baze ba demokrasia ne’ebé progresivu.
Oportunidade hanesan, Prezidente Tribunál Rekursu, Deolindo dos Santos hatete, hanesan Prezidente Tribunál Rekursu no Kámara de kontas tutela iha Tribunál Rekursu, bainhira atu hato’o mensajen ruma iha momentu lansamentu kontabilidade integridade no mekanizmu, ida ne’e ho hanoin ida katak, departamentu iha setór justisa atu kria sistema ida atu hetan kontabilidade ne’ebé di’ak responsabilidade ida boot atu bele hala’o servisu di’ak, liu tan.
“Ne’ebé ha’u atu dehan ita hotu katak projetu ida ne’e ha’u sente katak la’ós buat foun, tanba iha fulan kotuk ba ita foin halo enseramentu ba projetu ida ne’ebé finansia hosi Uniaun Europe ne’ebé hala’o hosi grupu Public Finance Management Oversight (PFMO), ninia benefísiu hanesan ho projetu ida agora daudauk ita hetan hosi povu Amerikanu sei ezekuta hosi Dexis, no projetu ida uluk ita hetan finansia hosi Uniaun Europe”. Nia haktuir.
Iha fatin hanesan, Vise Ministru Fortalesimentu Institusionál, Paulo Remédios, hatete programa ne’e Estadu Unidus Amérika ho sira nia Ajénsia USAID, sira ninia programa ida ne’e atu hametin demokrasia luta kontra Korrupsaun iha Timor-Leste. Programa ida ne’e envolvimentu departamentu Ministériu relevante iha setór justisa inklui Provedór Direitus Humanu.
“Ha’u lori Nonu Governu Konstitusionál no Ministériu Justisa, agradese ba Estadus Unidus Amérika, liuhosi sira nia Ajénsia USAID. Programa ida ne’e importante, ne’ebé hetan mós apoiu hosi ekipa CAC atu kontinua halo sira nia servisu, hametin PFMO mak ezekuta,” Nia haktuir.
Projetu ida ne’e povu Amerikanu apoiu ba governu Timor-Leste, atu fortalese responsabilidade ba luta kontra Korrupsaun. Tanba ne’e atu luta kontra Korrupsaun ida ne’ebé di’ak ,entaun presiza reforsa instituisaun, no xave ne’ebé involve ba prosesu kontra Korrupsaun, hanesan Tribunál Rekursu, tutela ho Tribunál de kontas, Ministériu Públiku, KAK, Inspesaun jerál estadu, PDHJ, Sosiedade Sivíl no hirak ne‘ebé halo servisu iha area kontrola ba Korrupsaun ne’e rasik.
“Kámara de kontas hanesan instituisaun úniku ne’ebé tuir lei halo fiskalizasaun ba legalidade no regularidade reseita estadu nian no mós despeza públiku no apresia ba jestaun finanseira no responsabilidade finanseira ba administrasaun sira karik akontese,” nia subliña.
Nia afirma, ema hotu iha konxiénsia katak Timor-Leste nasaun ida ne’ebé foun ho sistema foun ne’e , maibé iha difikuldade ne’ebé tenke prienxe hodi parents parseiru sira ne’ebé presiza apoiu, Tanba ne’e maka apoiu hirak ho modelu hanesan ne’e importante liu ba iha ema hotu liu-liu iha setór justisa nian.
“Ita labele ignora, tanba Timor ne’e hanesan ha’u dehan nasaun ida foun , mas la’ós moris iha, siklu pasadu sira ne’e mas moris iha siklu 21, ne’ebé hakarak ka lakohi ita tenke tau ita nia-an hanesan pais hotu iha mundu. Tanba ne’e mak ita halo esforsu hotu pelumenus ita la hanesan ho Pais dezenvolvidu sira mas ita nia sistema pelumenus prósimu ho pais hirak ne‘ebé ita bele konsidera katak sira nia sistema di’ak ,” nia konklui.
Entretantu Partisipa iha eventu lansamentu programa foun ne’e marka prezensa hosi Vice Ministru Fortalesimentu Institusionál, Prezidente Tribunál Rekursu, Prokuradór Jerál Repúblika, JSMP, PDHJ, Sosiedade Sivíl, no Enkarregadu Estadus Unidus Amérika iha Timor-Leste.
1,560 total views, 3 views today
Bele hare Video Seluk :
Subscribe to Timorpost
