Ermera(timorpost.com)—Traballadór Timor Oan, Abel Marçal Martins (30) ne’ebé maka hetan oportunidade ba servisu iha Austrália iha loron 26, fulan Setembru, tinan 2022, hatete sai hosi Timor husik fen, oan no família sira ba servisu iha ema nia rai ho objetivu ida hakarak hadi’a moris, tanba ne’e servisu ho pasiénsia maka bele manan buat hotu hodi bele muda moris.
Abel hatete, ekipa Media Tour ne’ebé maka Organiza hosi AJTL no Oxfam iha Timor-Leste kompostu hosi Média Nasionál 13 katak, nia remata Sekundáriu iha tinan 2015, atu kontinua ba universidade, maibé ekonomia hosi inan aman nian la sufisiente, tanba ne’e nia kontinua tuir formasaun lian Korea, maibé test dala tolu ka haat hanesan ne’e la pasa entaun liuhosi nia primu fasilita nia hodi aplika ba vaga Austrália nia pasa no iha loron 26, fulan Setembru, tinan 2022.
“Iha tinan 2015 ha’u remata Ensinu Sekundária, foku ba kursu lian Korea nian no ha’u remata kursu ha’u tuir teste repete ba repete ha’u nia naran lasai hela de’it, entaun iha tinan 2019 ha’u nia primu haruka ha’u ba tuir fali vaga Austrália nian, ikus mai ha’u nia naran sai no iha 2020 ha’u teste fíziku iha akadémiku depois prosesu to’o 2022, ha’u foin sai ba Austrália hodi servisu, to’o iha ne’ebá ita ema foun ne’ebé problema barak maka ita enfrenta, maibé ita pasiénsia no dixiplina maka importante hodi manan buat hotu”, Abel Marçal, hatete ba Jornalista Media Tour sira iha nia Rezidénsia Maudio, Aldeia Palimanu, Suku Fatuquiro, Postu Administrativu Railaco, Munisípiu Ermera, Kinta (19/04).
Nia hatete, primeira vés foin ba entaun la domina servisu saida maka iha ema nia kompañia ne’ebá, maibé di’ak maka sira hanorin hola ida ne’e no halo ida ne’ebá.
“Ha’u nia servisu iha Australia hanesan fabrika iha kompañia ho naran Mil Fil ne’ebé ha’u servisu bá no ha’u hanesan Chiller depois prosesu hodi haruka fali ba fatin seluk, ne’ebé ha’u kontratu ho kompañia ne’e tinan haat, maibé agora ha’u servisu tinan ida fulan lima no saláriu iha Australia selu tuir level ne’ebé maka iha primeiru ha’u ba iha level 1 hetan saláriu 21.50 sent Dollar Australia ne’e kada oras ida, maibé kompañia na’in haree ha’u servisu di’ak hasae liu ba level 3 no agora sa’e level 5 kada oras ida 30 Dollar Australia”, nia hateten.
Nia hatete, kompañia selu ne’e la’ós, maibé kada semana-semana. Semana ida maka servisu to’o Sábadu sira selu 1.200 ou 1.300 Dollar Australia no fulan ida bele 4.000 ou 5.000 Dollar Australia.
“Osan ne’ebé maka hetan ne’e ita maneja hatete, tanba ita sai hosi ita nia uma ka ita nia rain ho objetivu ida, to’o iha ne’ebá ita labele hanoin buat oi-oin, maibé hanoin maka servisu rai osan hodi haruka mai halo buat ruma iha ita nia rai liuliu ita nia família uma laran, ida ne’e maka importante ba ha’u”, nia haktuir.
Abel haktuir, iha ne’ebá nia kolega sira haruka tau osan hodi sosa tua, nia tau maibé nia la hemu no fuma ninia maka osan hodi sosa hahán ba han no hemu de’it, osan nia rai hamutuk hodi haruka ba família hodi sosa rai no halo uma.
“Iha ne’ebá ha’u la mete hemu no fuma, ha’u nia maka han loos de’it, kolega sira haruka tau osan hodi sosa tua ha’u tau, maibé ha’u la hemu no la fuma ha’u nia osan ha’u rai ba presiza nian ho sosa ba hahán de’it hodi haruka mai família sira iha ne’e. Durante ha’u ba Austrália primeiru ha’u servisu osan kada semana ha’u haruka mai hodi husu misa ba matebian sira no tuir fali osan sira ne’e ha’u tau hamutuk halo rate ka uma matebian sira nian, tuir fali maka haruka osan mai hodi sosa rai no halo uma rua katuas ferik nian no ha’u nian ne’e”, nia subliña.
Nia hatete, nia foti Cuti hodi mai halimar ho família sira no hadi’a nia uma depois fulan ne’e remata maka fila fali ba Austrália hodi kontinua servisu.
“Rai ne’ebé maka ha’u sosa ne’e ho medida 20×25 ho folin 5000 USD no uma ne’e ho medida 10×12 ho kuartu neen inklui dapur no hariis fatin iha laran, ne’ebé osan sosa rai no halo uma ne’e hamutuk 20.000 USD”,
Halo komparasaun uluk seidauk ba servisu iha ema nia rai ne’e hela ho ferik ho katuas ho uma ne’ebé kondisaun ladún di’ak, maibé agora sente mudansa ona, tanba ba servisu iha Austrália osan haruka mai halo uma ninian no katuas no ferik nian iha iha foho no osan selu mós alin sira nia eskola.
“Ami maun alin hamutuk na’in-10 mane na’in-neen no feto na’in haat, ha’u hanesan oan mane boot sente todan ba moris. Ba Australia sente buat hotu-hotu la’o ho di’ak ka kaman”, nia salienta.
Nia mehi ba oin halo tiha uma ne’e hotu sei iha tan planu ida maka atu hola tan karreta ida atu hodi bele uza no mós planu halo negósiu.
Iha sorin seluk hanesan, Manuela Martins Soares ho idade 26 hanesan fuan sorin hosi Abel Marçal Martins no sira na’in rua forma uma kain iha tinan 2019 iha oan mane ida, nia sente kontente, tanba hetan mane ne’ebé maka hatene responsabilidade ba nia família uma laran no ba nia inan aman sira.
Osan ne’ebé maka nia haruka mai hodi han hemu no oan nia hahán durante ha’u partu ha’u nia oan ne’e ha’u servisu iha restorante hodi sustenta ba ami nia uma laran, tanba hau katuas oan seidauk ba servisu, maibé grasa Maromak nian ha’u nia katuas oan ba servisu iha Australia haruka osan mai ba han hemu, halo uma no mós selu alin sira nia eskola”, nia tenik.
Aleinde ne’e tuir Dadus ne’ebé maka Diresaun Nasionál Empregu Estranjeiru SEFOPE nian, hahú hosi tinan 2012-2023, entre 13295 ne’ebé ba servisu iha Australia, traballadór 1311 hosi munisípiu Ermera, mane 991 no feto 320.
1,317 total views, 3 views today
Bele hare Video Seluk :
Subscribe to Timorpost
