BAUKAU (timorpost.com)-Joven mane ida ho naran kompletu Afonso Correia hakotu nia peregrinasaun moris iha mundu iha fatin akontesimentu tanba hetan soke husi karreta iha area Kampung baru suku Seisal postu administrativu Baukau vila.
Informasaun nee hato’o husi komandante PNTL munisípiu Baukau superintendenti Antonio Maria De Sa hatete, tuir kronolojia husi akontesimentu nee akontese iha Segunda (13/03/2023) tuku hitu ualu kala.
Karreta baskulante kinur ida husi diresaun postu administrativu Kelikai atu mai Baukau maibe too iha area kampun Baru suku Seisal soke vitima joven Afonso ne’ebé la’o hela iha estrada ninin.
Nia esplika tuir kronolojia ne’ebé simu husi seksaun tránzitu munisípiu katak kondutór kondús karreta baskulante númeru polisia 58-607 ho inisiál AMS tinan 27 husi dirasaun Kelikai mai Baukau halai ho Velosidade makas.
Derrepente mai too iha area kampung baru soke vitima Afonso Correia ne’ebé la’o hela iha estrada ninin.
“Atu klaru loloos asidente nee, parte investigasaun sei halo prosesu investigasaun ne’ebé kle’an”, sita ofisial PNTL ne’e
“Tuir kronolojia ne’ebé ha’u simu husi seksaun tranzitu katak hodi kalan ita nia kondutór karreta baskulante husi diresaun Kelikai mai Baukau halai ho velosidade makas ikus mai ita nia kondutór nee labele kontrola ikus mai konsege soke ema nia oan Afonso Correia neebe lao iha dalan ninin mate kedas iha fatin akontesimentu” dehan komandante PNTL Baukau Antonio Maria De Sa ba Timor Post Tersa feira (14/3) iha nia knar fatin.
Nia afirma, hafoin akontese matebian vitima Afonso Correia lori kedas ba hospital no suspeitu inklui karreta daudaun nee asegura hela iha kuartél PNTL Baukau atu halo prosesu investigasaun kontinuasaun kona-ba asidente soke mate vítima Afonso atu hatene loloos akontesimentu nee maibé informasaun ne’ebé iha katak kondutór halai ho velosidade makas.
Atuál komandante nee rekomenda ba motorista sira tantu transporte roda rua no roda hat apela ba motorista sira atu tau atensaun bainhira kondus motor ho karreta halai ho kuidadu no kuidadu asesór karreta ho motor foin halai iha estrada.(gut)
430 total views, 9 views today
