RAEOA (timorpost.com) — Prezidente Partidu Kongresu Nasionál Rekonstrusaun Timorense (CNRT), Kay Rala Xanana Gusmão, akompaña husi Sekretáriu Jerál CNRT, Fransisco Calbuadi Lay, Sábadu (14/01), halo abertura konsolidasaun Nivel Rejiaun ba CNRT iha Rejiaun Administrativa Espesiál Oe-kusi Ambenu (RAEOA), Sub-rejiaun Pante-Makasar, Suku Costa, Aldea Sanane.
Iha seremónia abertura ne’e ho tema “Hametin Konfiansa Baze Hodi Hakat ba Eleisaun, Fiar-an La’o Ba Oin” hafoin remata diskursu Koordenadór CNRT RAEOA, Firmino Taeke, tuir kedan Prezidente CNRT, Xanana Gusmão, bolu Koordenadór husi Munisípiu 12 no Deputadu ho Deputada na’in-21 husi partidu CNRT nian hamrik iha oin.
Prezidente Partidu CNRT Xanana, hatete iha tinan ida ne’e milliaun 3 USD, atu halo saida, iha tinan kotuk-kotuk oi-oin de’it hasai osan maibé justisa mós taka matan, korrupsaun mós taka matan, nune’e mós durante Covid-19 nian ema fó hahán ba ema sira ne’ebé iha ne’ebá, to’o agora sira seidauk selu ho sesta bázika ne’e.
“Sira arbiru de’it, tanba ne’e ha’u atu husu imi (Oe-kusse oan) sira hakarak nafatin ho situasaun ida ne’e ka lae, se lakohi tanba ne’e objetivu ohin ita hasoru malu iha ne’e, hodi serbisu makaas atu hasoru Eleisaun Parlamentar 2023 nian,” Xanana dehan iha Aula Numbei.
Prezidente Partidu CNRT ne’e, haktuir dala-ruma maluk sira ko’alia no rona kona-ba maioria, maioria ne’e dala-ruma la’ós sira absuluta maibé narativa, hanesan CNRT mak manaan karik iha Parlamentu, iha tinan ne’e CNRT iha kadeira 27, atu bele lei sira liu, bele forma Governu Timor-Leste no halo ho programa ne’ebé di’ak.
“Ita presiza kadeira hamutuk 33, se ita iha de’it 32 tenke tetap lakon, maibé kuandu 33, ne’e sei forsa, karik liuhusi 33 ne’e di’ak liu tan,” nia hateten “Se ita mak hetan de’it kadeira 30 para hetan tan kadeira 33 nune’e bele manaan iha Parlamentu ho halo desizaun para bolu Partidu ki’ik sira mai,” Xanana relata.
Xanana subliña, atu nune’e mai ho kadeira 2 husu atu ninia ferik oan tenke sa’e Vise-Primeiru Ministru no ida fali ho kadeira 1, maibé nia husu Ministeriu 5, tan ne’e sira atu serbisu ona ho hanoin ne’ebé la hanesan.
“Tanba ne’e mak ita hili liafuan mutlak ne’e katak, tenke maioria ho absuluta,” Xanana hakotu.
Enkuantu tuir observasaun Timor Post Online iha serimónia abertura ne’e mós iha militante na’in-3 husi partidu FRETILIN no FRENTE MUDANSA afilia ba CNRT no na’in-3 ne’e hetan kedan kamijola partidu nian, entrega husi Prezidente Partidu CNRT, Xanana ho Sekretariu Jerál CNRT, Kalbuadi Lay.
4,416 total views, 9 views today
