Manufahi(timorpost.com)—Prezidente Autoridade Munisipiu Manufahi (PAMM), Luis Marçal da Costa Tavares, hatete, durante nia mandatu tau prioridade ba setór Turizmu no setór Agrikultura, tanba Manufahi fatin turízmu barak bele atrai turista sira no mós rai ne’ebé bokur no mós potensiál ba agrikultura ninian.
“Ita atu preparasaun ba kámara municipal, entaun ita tenke iha retornu rasik ba munisípiu, entaun ho ida ne’e ha’u konsidera setór turizmu no setór agrikultura maka sai prioridade ba ha’u durante ha’u nia mandatu,” Luis Marçal da Costa Tavares, informa ba Timor Post iha ninia servisu fatin, Administrasaun Munisípiu Manufahi, Sesta (16/02).
Nia hatete, Turista mai ne’e la’ós vizita de’it, maibé tau netik buat ruma iha ne’ebá no mós sosa produtu lokál sira ne’ebé agrikultór sira prodús, produtu lokál sira ne’e mai hosi ne’ebé, mai hosi agrikultór sira.
“Ne’ebé Agrikultura ita iha ona apoiu tratór lubuk ida hosi Ministériu Agrikultura Pekuária Peska no Floresta (MAPPF) no sira mós hadi’a tratór sira ne’ebé aat sira no sira hadi’a ona irrigasaun sira ne’e maka prioridade”, nia haktuir.
Nia salienta, setór turizmu no setór agrikultura la’o di’ak ne’e tenke ser iha uluk ida infraestrutura báziku sira hanesan estrada, ponte, bee moos, eletrisidade no infraestrutura báziku sira seluk tan.
“Buat sira ne’e hotu iha ligasaun, tanba ne’e konforme hosi ita nia planu, maibé ita sei implementa uluk maka ida ne’e”, nia subliña.
Agora daudauk iha Postu Antigu, iha instituisaun estadu balun maka uza hela edifísiu sira ne’ebé PAM Manufahi koko halo sosializasaun ba sira verbálmente atu nune’e sira prepara sira nia fatin tinan ida rua mai ne’e sira hamamuk ona fatin sira atu nune’e ba oin bele fó ona ba investor sira bele mai halo investimentu.
“Tanba ita nia planu sira ne’e hanoin dook loos, tanba ita iha vizaun ida katak se ita tama duni ba membru ASEAN, entaun ita nia preparasaun kondisaun karik iha enkontru boot sira nivel ASEAN bele mai iha Manufahi, ne’ebé ita prepara fatin sira ne’e, tanba iha postu antigu ne’ebá fatin ne’ebé luan no fatin ne’ebé estratéjia”, PAM Manufahi haktuir.
Irrigasaun ne’ebé boot liu maka irrigasaun Karau-Ulun, agora daudauk MAPPF tau ona eskavator ida ne’ebá hodi halo reabilitasaun ba irrigasaun sira ne’ebé maka rai henek nakonu iha laran ne’e, tanba iha tinan 2016 hosi Banku Mundiál no halo mudansa ba sistema irrigasaun DAM ba fali sistema free-intek.
Hosi sistema foun ne’e maka sempre hamosu problema beibeik iha free-intake hetan intupidu tanba bee hosi mota direta ba kedan iha irrigasaun sira ne’e, ne’e maka problema, tanba ne’e maka tau eskavator ida iha ne’ebá kuandu udan boot lori rai henek, tékniku sira uza hodi hasai rai henek sira ne’e.
Aleinde ne’e Prezidente Autoridade Munisípiu Manufahi subliña, PAM Manufahi sei enfrenta hela kona-ba planu orsamentu, tanba ezekuta hela planu orsamentu anterior nian.
“Atu dehan de’it buat hotu-hotu ita hala’o ho onestu no seriedade sempre hetan dalan, maibé ita iha difikuldade maka hanesan ita ezekuta planu orsamentu anterior nian, tanba anterior sesante sira maka halo planu, maibé ita maka ezekuta, maibé ami koko rezolve ho maneira lubuk ida hosi parte Administrasaun Finansas nian no to’o ohin loron buat hotu la’o normal”, nia hateten.
Kona-ba alokasaun orsamentu ba Munisípiu Manufahi tinan ne’e iha Millaun 6,401,792 USD no hosi orsamentu ne’e Saláriu Vensimentu 1,769,261 USD, Bens Servisu 792,483 USD, Transferénsia Públiku 2,296,232 USD, Kapitál Menór 60,000 no Kapitál Dezenvolvimentu 1,483,816 USD.
939 total views, 3 views today
Bele hare Video Seluk :
Subscribe to Timorpost
