DILI (timorpost.com)—Konselleiru Másimu, Jose dos Santos “Naimori’, iha Kongresu Partidu KHUNTO ba dala-haat “lekar” sai Deputada Olinda Guterres nia sala durante ne’e assume kargu hanesan xefe bankada iha Parlamentu Nasional.
“Se ha’u konta nia (Olinda) sala, nia sala barak, nia ba iha Australia, nia sala ida ba iha Indonézia halo moe ita-nia Prezidente, hirus fali protokulu, ne’e la di’ak, nia sala ida ba iha Xina nia rain ho Deputada husi CNRT han malu, nia sala ida mak han iha plenária,” Lekar Naimori iha abertura kongresu Khunto ba dala-haat iha salaun Delta Nova, Sábadu (20/04).
Nia hatutan, iha Partidu KHUNTO la hanorin hahalok sira hanesan ne’e, tan ne’e presiza hadi’a nune’e ba futuru labele mósu tan.
“Ama olinda tau ha’u iha facebook buat hotu, tanba ha’u halo korrupsaun, husu took deputadu sira ne’e imi-nia osan hirak mak fó ha’u, husu took sira iha ka lae, Ama olinda fó nia konta hira. Nia troka tanba nia kondisaun saúde la di’ak, ne’e mak haruka maun Antonio ba fali,” esplika nia.
Tuir nia katak, Partidu KHUNTO ne’e ema rihun-limanulu ninia kosar been, la’ós Naimori nian. Tenke respeitu sira, maski ne’e polítika.
“Ha’u la hasai nia (Olinda), husu ba deputadu na’in-haat ne’e, atu troka nia husi xefe Bankada, tanba atu fó oportunidade para sira bele ko’alia povu-nia moris iha parlamentu saida mak ba vizita eleitoral ne’e para bele diskute,” klarifika nia.
Tanba ne’e, Partidu KHUNTO ne’e ema-hotu nian, karik buat ruma naksalak presiza tuur hamutuk atu ko’alia, la’ós ema-ida ninian hodi ba lekar iha media sosial.
“Respeita nu’udar inan mai ita ko’alia didi’ak, Khunto ne’e ita hotu ninian, partidu ne’e ita hotu nian la’ós ema ida nian. Depois ita nu’udar lideransa ida labele halo diskriminasaun iha Parlamentu. Tanba ne’e ha’u lakohi, ha’u bandu,” esplika nia.
Konselleiru Másimu ne’e hateten, durante ne’e media barak kontaktu atu klarifika problema internal ne’e, maibé seidauk tempu, no ohin mak oportunidade atu klarifika Deputada Olinda Guterres nia sala sira.
Nia fundamenta, Presiza halo relasaun di’ak ho partidu sira seluk ne’ebé eziste iha nasaun ne’e, hodi nune’e kuda metin nafatin demokrásia iha nasaun ki’ik ida ne’e.
1,443 total views, 3 views today
Bele hare Video Seluk :