Likisá (timorpost.com)-Lider Troika FRETILIN, Lere Anan Timur, husu ba militante sira vota ba partidu FRETILIN iha loron 21 fulan Maiu 2023, hodi bele ba kaer ukun.
Nia hatete ba militante sira se ba vota haree didi’ak mak vota, tanba númeru 11 ho 12 ne’e Partidu boot rua, FRETILIN ho CNRT.
“Ha’u-nia hakarak FRETILIN tenke ukun, maibé labele ukun mesak tenke bolu intelektual sira, no lider istóriku sira hotu”, nia hateten iha komísiu Kampaña Partidu FRETILIN, iha Munisípiu Likisá, Domingu (30/04/2023).
Nia dehan, nasaun ne’e lider sira ukun hamutuk mak bele hadi’a povu nia moris no dezenvolve rai ne’e.
Alende ne’e nia sita mós programa partidu FRETILIN nian balun, katak FRETILIN ba kaer ukun sei prioridade hadi’a setór defeza no lei ba arte marsias.
“Tanba ita ko’alia fronteira marítima tenke haruka militar sira ba hein, nune’e mós fronteira terrestre,” nia hateten.
Tanba ne’e, nia dehan uluk kedas ko’alia ona, tenke koloka militár ba fatin importante hirak ne’e.
Nia hatutan, prioridade seluk mak FRETILIN ba ukun sei hadi’a mós regras ba arte marsias sira, hodi nune’e bele regula no dezenvolve di’ak liu talentu joven sira nian hanesan desportu ne’ebé bele hamorin mós Timor nia naran iha rai li’ur.
2,571 total views, 6 views today
Bele hare Video Seluk :