DILI (timorpost.com)—Polisia Nasionál Timor-Leste (PNTL), detein joven na’in-ida ne’ebé deskonfia envolve iha kazu harahun komunidade nia uma ho sasán iha area Hudi-Laran, Suku Bairru-Pité, Postu Administrativu Dom Aleixo, Munisípiu Dili.
Komandante PNTL Munisípiu Dili, Superintendente Xefe Polisia Natérsia Eufrásia Martins Soares, haktuir, kazu konfronta akontese iha area Hudi Laran entre arte marsia no rituais no konsege harahun komunidade nia uma ho sasán, Polisia Eskuadra Dom Aleixo too kedas iha fatin akontesimentu hodi halo atuasaun no konsege kaptura suspeitu nian-rua.
“Horikalan ita kaer ema na’in-rua iha terrenu, maibé ida seluk ita halo de’it identifikasaun, tanba faktu la sufisiente, maibé ida fali ne’e ita kaer tanba ita haree nia halo hela aktu krime ne’e, ida ne’e prosesu ketak ida, ita detein nia ba 72 oras de tempu depois ba primeira interrogatóriu,” nia hateten hafoin atividade sosializasaun iha Postu Administrativu Vera Cruz, Kinta (11/05).
Nia haktuir, relasiona ho kazu ne’e rasik, maski sira kaptura de’it suspeitu na’in-ida, maibé iha gravasaun no tuir video CCTV ne’ebé iha, komandu sei haree fila, mak identifika ema sira ne’e sei halo xamada ba sira, tanba gravasaun lubuk ida mak iha polisia nia liman.
“Ha’u haree iha relatóriu la hetan kanek ka mate, maibé haree mak ema nia sasán sira hetan estragu,” nia dehan.
Nia hatete, vítima sira ne’ebé sasán hetan estragu ne’e, balu hato’o ona sira-nia keixa no barak mak seidauk mai hato’o keixa.
“Mais, hakarak ka la kohi kuandu iha ona aktu krime signifika iha suspeitu no mós iha vítima, sasán sira ne’ebé iha ita sei tau hodi aprezenta ba iha Ministériu Públiku,” nia informa.
Nia hatete, motivu husi problema ne’e, PNTL identifika katak mai husi arte marsia no rituias, hafoin iha organizasaun balun lori nia maluk ba tuir misa, depois serimónia funeral mak akontese problema ida ne’e.
“Ohin dadersan mós ita komunika hamutuk ona ha KRAM, oinsá mak atu bele haree no atu resolve situasaun ida ne’e para labele akontese iha futuru no oinsá mak iha KRAM nia kompeténsia no koordenadór para haree liubá iha sansaun administrativa, mais ida ne’e ha’u lakohi ko’alia tanba kompeténsia KRAM sira nian,” nia afirma.
Prevene Konflitu iha ElPar
Polísia Nasionál Timor-Leste (PNTL) liuhusi Komandu Polisia Munisípiu Dili kontinua alerta ba Autoridade lokál sira liuliu iha sidade Dili, atu prevee konflitu iha perante Eleisaun Parlamentár (ElPar).
Tuir Komandante PNTL Munisípiu Dili, Superintendente Xefe Polisia Natérsia Eufrásia Martins Soares, asuntu ida ohin mai halo diskusaun kleur tiha ona hatutan husi programa Komandu PNTL Munisípiu Dili nian, ne’ebé koopera ho autoridade sira hotu, atu halo vizita ba suku sira ne’ebé hanesan prioridade ba vizita.
“Maibé, husi Postu Administrativu Vera Krús, ita-nia maun no ita-nia administradór postu rasik hamosu hanoin ida dehan oinsá atu halibur xefe suku husi area Vera Kursu nian no hamutuk ho autoridade xefe aldeia no mós brigada sira atu fahe informasaun ruma liga ba iha oinsá entre autoridade suku atu fó apoiu ba komandu PNTL,” nia hateten hafoin atividade sosializasaun iha Postu Administrativu Vera Cruz, Kinta (11/05).
Nia dehan, husi atividade hirak ne’e, rezultadu ikus situasaun bele la’o ho di’ak nafatin ba komunidade no liuliu vulneravel sira atu sente seguru.
“Tempu ida ne’e, hanesan mós oportunidade atu fahe informasaun kona-ba konflitu sira, liuliu kona-ba seguransa nian ba komunidade sira,” nia hateten.
Kampaña iha Dili
Polisia Nasionál Timor-Leste (PNTL) pontu fó seguransa ba atividade partidu polítiku sira tuir ajenda husi Komisaun Nasionál Eleisaun (CNE, sigla portugés) ne’ebé iha loron 12 to’o 18 fulan Maiu atividade kampaña remata iha Dili.
“Agora Komandu Jerál fó konfiansa ba komandu PNTL Munisípiu Dili, atu sira halo jestaun ba membru sira hodi halo seguransa ka apoiu partidu polítiku sira ne’ebé halo kampaña,” nia Komandante Natércia.
Nia dehan, lokraik ne’e, sei halo enkontru ho Komandu Jerál, halo aprezentasaun ida, mais ou menus forsa hirak mak hatún, ida ne’e estratéjia komandu nian, la presiza publika iha ne’e.
“Maibé, ita sei mobiliza forsa hotu atu tuun ba iha terrenu atu bele fó apoiu seguransa ba iha atividade kampaña eleitorál to’o eleisaun parlamentár 2023 bele la’o di’ak no susesu,” nia hateten.
2,844 total views, 3 views today
Bele hare Video Seluk :
Subscribe to Timorpost
