DILI (timorpost.com) – Autoridade Munisípiu Dili (AMD) iha ona planu atu nune’e ba oin sei hapara kontratu servisu ho kompañia lima ne’ebé durante ne’e hala’o servisu ra’ut fo’er iha kapitál Dili hodi uza ekipamentu modernu nian mak ra’ut fo’er.
“Ba oin ami sei hapara kontratu kompañia lima ne’ebé ra’ut fo’er iha postu administrativu Vera Krús, Na’in Feto, Dom Aleixo, Kristu Rei no Metinaru labele ra’ut fo’er ona, tanba sira uza manual lori kanuru boot mak suru fo’er ne’e impaktu mós ba sira nia saúde,” Prezidente Autoridade Munisípiu Dili, Guilhermina Filomena Ribeiro, hateten ba Timor Post iha Matadouru, Sesta (12/05).
Tanba ne’e mak, AMD hapara kontratu ho kompañia lima ne’e hodi haree de’it projetu ne’ebé uza ekipamentu modernu ne’ebé uza jestaun ateru kontroladu, entaun ema la uza kanuru boot mak ra’ut fo’er, maibé uza ekipamentu modernu nian mak ra’ut fo’er rasik hodi tau iha karreta depois lori ba Tibar.
Nia konta, iha fulan Setembru, projetu ne’e implementa iha terenu la’o di’ak ona no hakarak ka lakohi tenke hapara kontratu ho kompañia lima ne’ebé ho nia karreta kamioneta 70 servisu ra’ut fo’er iha Dili laran ne’ebé uza manual.
Nia dehan, projetu refere implementa iha suku 32 no postu administrativu lima ne’e hodi fasilita komunidade nasionál no internasionál no komersiante ne’ebé produs lixu bele tau iha kaixote hamutuk rihun ida resin depois mak foin lori ba tau iha Tibar.
“Ha’u husu ba xefe suku no xefe aldeia sira atu halo sosializasaun ba komunidade atu soe fo’er hahú tuku 06:00 lokraik to’o tuku 06:00 dadeer, atu nune’e pesoál saneamentu sira kontrola bele ra’ut fo’er hodi tau iha karreta atu lori ba Tibar. Nune’e, iha futuru bele redús lixu iha sidade Dili no redús inundasaun iha tempu udan,” nia hatutan.
Guilhermina dehan, iha dekretu lei ministerial 4/2023 ne’ebé ko’alia kona-ba oras soe fo’er nian iha tuku 06:00 dadeer to’o tuku 06:00 dadeer liuhusi oras ida ne’e labele soe fo’er tan, tanba kompañia labele foti ona.
2,022 total views, 3 views today
Bele hare Video Seluk :
Subscribe to Timorpost
