(Reportajen Estajiádu Mariano Abi/Editor Mateus da Cruz)
Dili (Timor Post) – Mission Aviation Fellowship (MAF) servisu hamutuk ho Asosiasaun Turizmu Ataúro, Governu Timor-Leste no USAID nia Projetu Turizmu Ba Ema Hotu ohin lansa voo doméstiku regulár MAF atu halo operasaun ba iha rute Dili no Ataúro ho kustu ema ida kada viajen dolar 30-70.
Country Director MAF, Nick Hitchins, dehan, servisu voo ne’e sei fornese viajen ne’ebé lalais, konfiavel ba turista sira atu ba iha illa refere, fasilita turista sira ba iha illa sei ajuda hamoris ekonomia lokál durante pandemia COVID-19 globál, no sei lori esperansa ba indústria turizmu lokál foun.
“Ne’e hanesan parte husi ami nia komitmentu ba dezenvolvimentu kapasitasaun nasionál, no mós ami nia komitmentu atu ajuda, lori esperansa no rekuperasaun ba povu Timor-Leste ne’ebé izoladu,” nia esplika liu husi lansamentu Voo Doméstiku Regular MAF rute Dili-Ataúro ne’ebé hala’o iha Aeroportu Nasionál Prezidente Nicolau Lobato, sesta (01/04).
Iha sorin seluk, Ministériu Transporte Komunikasoens (MTK), José Agustinho da Silva, hatete, ohin halo lansamentu Voo Doméstiku Regular MAF rute Dili-Ataúro ho ojetivu atu fasilita populasaun ne’ebé mak halo viajen uza meus transporte Aero, hodi promove setór turísmu, tanba durante ne’e ita iha de’it ligasaun roo ahi maibé ho oportunidade ida ne’e bele fasilita di’ak liu tan.
“Ohin ha’u ho membru governu na’in rua akompaña ho embaxadór Estadus Unidus Amerika no Embaxador Nova Zelandia, ami nain hira halo viajen ba Ataúro hodi hare paisazen furak tebes, ami semo dulas Ataúro ho durasaun 15 minutu, no agora ami to’o fali ona Dili,” nia dehan.
Entretantu, Prezidente Autoridade Nacional de Aviação Civil de Timor-Leste (AACTL), Eusébio Freitas, dehan, aviaun MAF hala’o ona servisu maka’as durante tinan 15 iha autorizasaun AACTL nian atu kontribui ba iha dezenvolvimentu rai doben Timor-Leste.
“No ami apresia liután ba MAF nia kontribuisaun ne’ebé daudaun halo ba turizmu iha rai laran, liu-liu atu liga Dili ho Ataúro, hodi nune’e bele fasilita turista barak vizita illa Atauro,” nia hatete.
Alende ida ne’e mós, Enkaregadu Negósiu Embaixada EUA, Tom Daley, hateten Voo foun ne’e hanesan pasu importante ida husi Estadus Unidus nia apoia ba Timor-Leste nia dezenvolvimentu indústria turizmu.
“Liuhusi USAID nia projetu Turizmu Ba Ema Hotu, ami servisu hamutuk ona ho Asosiasaun Turizmu Koleku Mahanak Ataúro (ATKOMA), hodi prepara lori hikas turista internasionál sira fila mai Timor-Leste. Servisu ida ne’e selu ona dividendu importante sira ne’ebé mai husi COVID-19, inklui liu-husi inagurasaun Sentru Informasaun Turístika ida no progresu sira seluk,” nia relata.
Ho nune’e, Diretora Misaun USAID iha Timor-Leste, Zema Semunegus, haforsa tan katak, USAID nia projetu Turizmu Ba Ema Hotu (TBEH) mak ajuda povu Ataúro harii ATKOMA atu jere destinasaun no enkoraja MAF no ATKOMA atu servisu hamutuk hodi bele hadia ligasaun transporte no hasa’e númeru vizitante ba iha illa Ataúro.
“Haree husi perspetiva turismu, Ataúro nu’udar illa ida ne’ebé riku ho paizajen naturál, kulturál no istória ne’ebé bele atrai ema barak atu ba esplora hodi kontribui ba ekonomia lokál no nasaun, tanba ne’e importante tebes atu iha meius transporte tantu marítima no aero, atu hasa’e númeru turista ba iha illa refere,” nia dehan.
Enkuantu folin estandar billete aviaun ba kada ema ida ba kada viajen hahú husi dolares Amerikanu 30-75, servisu Voo Dili no Ataúro ne’e sei komesa iha loron 1 fulan-Abril 2022, depoisde lansamentu iha Aeroportu Internasionál Prezidente Nicolao Lobato. Servisu Voo ne’e la’os atu fasilita turista sira de’it, maibé ninia viajen ba-mai mós bele aproveita husi staff ONG no ema lokál sira.
Ho ida ne’e, oráriu kona-ba Voo Rute Dili-Ataúro monu iha kada loron Segunda dadeer no Sesta lokraik kada semana. Segunda Dadeer Aranka husi Dili 07.30 to’o iha Atauro 07.50 no aranka husi Atauro 08.10 to’o to’o iha Dili 08.30, sesta lokraik aranka husi Dili 16.30 to’o iha Atauro 16.50 ou aranka husi Atauro 17.10 to’o iha Dili 17.20.(Asesu Notisia Seluk Iha Jornal Timor Post/ Asesu You Tube Timor Post)
788 total views, 3 views today
Bele hare Video Seluk :
Subscribe to Timorpost
