DILI (timorpost.com)—Vise-Primeiru-Ministru, Ministru Asuntu Sosiál no Ministru Dezenvolvimentu Rurál no Abitasaun Komunitáriu, Mariano Assanami Sabino realiza Workshop Kombate Redusaun Inseguransa Alimentár no Má-Nutrisaun. Iha nia intervensaun hatete, problema ma-nutrisaun krónika as iha rejiaun ne’e tanba ne’e presiza preparasaun hodi kombate Redusaun Inseguransa Alimentár no Má-Nutrisaun.
“Ita nia nasaun hasoru problema ida kona-ba oinsá ita halo preparasaun ba ita nia oan sira tanba investe ita oan sira mak sei lori nasaun ne’e bá oin no futuru ita hotu hatene katak iha ita oan sira mosu problema ne’ebé boot no ohin ita nia nasaun hasoru maka problema Ma-nutrisaun krónika ne’ebé maka ass iha rejiaun ida ne’e.”Assanami Sabinu hato’o asuntu ne’e ba Jornalista sira iha Salaun Konferénsia Ministériu Finansas Ai-tarak-laran, Kinta (02/05).
Governante ne’e haktuir, iha isu tolu mak ita presiza servisu, primeiru labarik sira mak futuru kontinuasaun nasaun nian, problema ma-nutrisaun krónika ne’e komplikadu no dezafiu boot. Segundu, bolu INSIDI liuliu Bebé no ki’ik oan sira oinsá ita prepara investe sira oinsá bebé sira nia futuru la’o ho di’ak nafatin ba oin. Terseiru, seguransa ai-han presiza prepara kapasita labarik sira oferese hahán ne’ebé nutrisaun.
Kompeténsia ida ne’e atribui ba Vise-Primeiru-Ministru hodi elabora, ezekuta no halo kontrolu ba polítika hirak ne’ebé define ona husi Konsellu Ministru iha área sosiál, liuliu iha ámbitu kombate redusaun inseguransa alimentár no má nutrisaun.
KONSSANTIL mak órgaun interministeriál ne’ebé responsavel ba koordenasaun hodi elabora, implementa, monitoriza no avalia polítika públika ne’ebé iha relasaun ho seguransa no soberania alimentár no nutrisionál.
Objetivu hosi KONSSANTIL maka asegura implementasaun Planu Estratéjiku Dezenvolvimentu Nasionál no programa Governu nian kona-ba matéria ne’e, dezenvolve no promove mekanizmu atu halo koordenasaun no hodi reforsa kapasidade instituisaun públika sira no rekursu hirak ne’ebé eziste ona, atubele reduz inseguransa alimentár no má nutrisaun no hodi implementa planu ba seguransa alimentár no nutrisaun.
Rekorde katak KONSSANTIL harii iha tinan 2017 bazeia ba deklarasaun Comoro iha tinan 2012, ne’ebé kompostu hosi Ministériu Agrikultura no Peska (MAP), Ministériu Edukasaun, Juventude no Desportu (MEJD), Ministériu Saúde (MS), Ministériu Obra Públika (MOP), Ministériu Solidaridade Sosiál no Inkluzaun (MSSI), Ministériu Turizmu, Komérsiu no Indústria (MTKI), Ministériu Negósiu Estranjeiru no Kooperasaun (MNEK), no Organizasaun Mundiál ba Ai-han (FAO) hanesan parseiru.
2,043 total views, 12 views today
Bele hare Video Seluk :