Liberdade Imprensa (Freedom of the Press), ne’e direitu ida ne’ebé konstituisaun rasik garante inklui kodigu kondutu no lei Komunikasaun Sosiál ne’ebé proteje ba direitu no devér liga ba servisu profisionais jornalista sira, ne’ebé servisu iha meius komunikasaun sosiál ne’ebé eziste hanesan jornál, radio, televizaun no online.
Oinsá liberdade Imprensa iha Timor-Leste? Hafoin Timor Leste restaura nia ukun-an. Timoroan lubuk harii jornál, Radio, Televizaun no online.
Osan lukru hosi atividade sira ne’e mak mídia na’in uza hodi selu saláriu ba servisu na’in, selu taxa ba estadu, selu ahi eletrisidade, seguransa sosiál no seluk tan. Iha Timor-Leste maioria ema ne’ebé sai asinantes no públika publisidade hosi governu rasik, hafoin emprezáriu no ema indivíduu.
Liga ba situasaun polítika rai laran ne’ebé la saudavel, mídia liu-liu jornalista sai ameasa ba fontes, liu-liu fonte sira ne’ebé la gosta lialos. Sira uza maneira oioin ameasa jornalista, balun ameasa la fó asesu ba jornalista hodi tama ba iha fatin hala’o atividade hodi jornalista sira bele haree rasik ho matan nune’e halo diskrisaun iha notísia.
Balun to’o ameasa hapara jornál ne’ebé durante ne’e sira sai asinantes, maneira ida ne’e hodi hakarak hamate deit ezisténsia mídia ida nian, balun ameasa direta ba jornalista sira iha terenu no balun ameasa mai to’o iha instituisaun mídia ida nian.
Situsaun sira ne’e hanesan asesidu ne’ebé parte sira halo hasoru liberdade imprensa.Sátanasesidu ne’e, karik halo hosi fontes mai hosi governantes. Governu ou ukun nain labele konsidera mídia hanesan sira nia inimigu, maibé hanesan parseiru diak ida, tanba parte rua presiza malu iha situsaun aat no di’ak tuir funsaun ida-idak nian.
Jornalista sei kaer de’it ba faktus, lialos no independente, jornalista sai ponte ba sira be lian laiha hodi hato’o ba iha ukun nain no ba Estadu. Ukun na’in di’ak nia halo servisu sempre koopera ho mídia hodi promove nia servisu, hanesan konsagra iha lei komunikasaun sosiál, Knar ida husi Estadu Timor-Leste iha artigu 5, alínea F, hatete estabelese medida sira apoiu nian ba órgaun komunikasaun sosiál privadu sira nian.
Entretantu, knar komunikasaun sosiál nian nu’udar parseiru ba dezenvolvimentu nian, ida mak fó motivasaun no apoiu ba polítika ekonómika no servisu kualidade nian, signifika mídia liu hosi nia jornalista halo kontrolu ba lala’ok governante, hodi fó sai de’it lialos liga ba sira nia servisu, karik laiha kualidade, jornalista bele kritika liu hosi nia obra produtu, maibé tenke bazeia ba faktus no lialos.
No governante di’ak sei konsidera kritika konstrutivu hanesan audit ida ne’ebé mak jornalista halo gratuita ba sira nia servisu, nune’e bele dezafia sira hodi hadi’a-an hodi sai ukun na’in di’ak no kualidade. Tanba ne’e servisu jornalista no ukun na’in ne’e paraseria moris, hakarak ou lakohi, na’in rua sempre la’o hamutuk iha situasaun aat no di’ak.
Karik fontes ida sente sai vítima hosi notísia ne’ebé jornalista halo la tuir saida mak fontes ne’e ko’alia, uza direitu ba resposta ida ne’ebé regula iha kódigu konduta jornalista nian artigu 6, ne’ebé hatete, “konfirma no verifika informasaun hothotu ne’ebé simu molok atu públika, rekoñese informasaun sira ne’ebé sala hafoin publikasaun no hadi’a lalais kedas, respeita sidadaun nia direitu atu hatán”.
Mídia iha obrigasaun hadi’a lalais notísia ne’ebé karik iha provas hosi fontes hatudu sala. Parte iha korresaun ne’e sai lisaun ida ba jornalista hodi hadi’a nia-an hodi sai profisionál no kredivelliután, tanba mídia mós aprende hosi fontes no públiku, no fontes mós aprende hosi nia sala. Jornalista no ukun na’in di’ak la signifika la komete erru, maibé bainhira sira la baruk atu halos hosi sala ne’ebé iha. Parabéns ba Jornalista hotu iha Mundu liu-liu iha Timor Leste !
915 total views, 6 views today
Bele hare Video Seluk :
Subscribe to Timorpost
