Dili(timorpost.com)—Reabilitasaun Estádiu Munisipál Dili no partisipasaun iha jogu Asian Games, sai prioridade ba Ministru Juventude Desportu Arte no Kultura (MJDK), Nélio Izaac Sarmento, nia relatóriu loron 120.
Nia dehan, prioridade ba nia atu halo durante loron 120 ne’e mak, atividade sira ne’ebé mak iha tinan kotun sei pendente hela to’o agora, sira ne’e mak sei sai prioridade ba relatóriu loron 120 nian ne’e hodi halo.
“Hanesan reabilitasaun ba Estádiu Munisipál Dili, Asian Games, tanba kona-ba Asian Games ne’e ita atu partisipa, maibé iha tinan kotuk governu la tau osan, agora ha’u tenke esforsu hodi tau osan nune’e ita nia delegasaun sira tenke ba partisipa”, Ministru Juventude Desportu Arte no Kultura, Nélio Izaac Sarmento, iha Parlamentu Nasionál, ba Timor Post, Tersa (18/07).
La’ós ida ne’e de’it, maibé sei haree mós problema sira kona-ba infraestrutura lubuk ida ne’ebé iha tinan kotuk labele la’o agora tenke normaliza fila fali, atu nune’e ema bele servisu fali ho di’ak, nune’e bele finaliza tiha.
“Ha’u fó ezemplu hanesan KOICA nian ne’e ita normaliza sira ho governu intensaun ita nia atu nune’e sira bele servisu ho di’ak nune’e bele termina tuir tempu ne’ebé mak iha, depois asuntu ki’ik oan sira balun tan inklui ho arte kultura nian”, nia hateten.
Tanba arte kultura nian ne’e grupu barak uluk abandona tiha agora oinsá mak bele akumula fali sira, nune’e bele hetan fali esperansa atu iha tinan oin bele apoiu ba arte no kultura mais di’ak liután iha futuru sira mai ne’e.
“Tanba iha fulan Outubru ka Novembru nia laran ne’e ita sei iha eventu barak ba Arte no Kultura, entaun ita presiza iha involvimentu barak liután ba iha area Arte no Kultura ninian, tanba ko’alia kona-ba arte ne’e iha buat barak loos”, nia esplika.
Tuir eis Jornalista ne’e katak, arte ne’e la’ós dansa de’it, maibé arte ne’e ko’alia mós kona-ba pinta, múzika, dansa, ka grupu sira ne’ebé mak durante ne’e sente laiha apoiu hosi governu agora koko tenta hodi akumula buat hirak ne’e hotu.
1,293 total views, 3 views today
Bele hare Video Seluk :