MANUFAHI (timorpost.com) — Estrada hahú husi area Lihu Lolo tama to’o Same villa ne’ebé foin lalais hetan estragus husi udan boot ne’e presiza halo konstrusaun foun tanba kondisaun grave liu.
Administradór Munisípiu Manufahi, Arantes Isaac Sarmento, hatete, oras ne’e daudaun tékniku husi Ministériu Obras Públika (MOP) halo ona levantamentu dadus ba estrada no ponte sira ne’ebé hetan estragus.
“Estrada no ponte ne’ebé hetan estragus ne’e hetan ona levantamentu husi ekipa tékniku MOP tantu nasionál no munisipíu atu hodi halo konstrusaun foun,” Arantes hateten ba jornalista sira iha nia knaar fatin Same, Sesta (21/07).
Tanba ne’e, ba daudaun ne’e ne’e Administradór Munisípiu Manufahi hamutuk ho Institutu Jestaun Ekipamentu (IJE) ho obras públiku loke estrada alternativu hodi fasilita movimentu transporte públiku.
“Ne’e duni estrada husi Lihu Lolo, mai Holarua no eis komarka Japaun ninian ne’e presiza halo konstrusaun foun liuhusi projeitu emerjensia no hein deit implementasaun tanba dezeñu ho Building Of Quality (BOQ) hotu ona,” nia hateten.
Arantes reafirma, estrada ne’ebé hetan estragus ne’e sei la halo reabilitasaun, maibé tenke halo konstrusaun foun, tanba estrada balun iha Carbulau, suku Holarua sai tiha hanesan mota.
“Aleinde estrada inklui ponte abatu, maibé dadaun ne’e sei halo uluk ponte provizoriu ida hodi fasilita lai movimentu transporte ba mai,” nia relata.
Autoridade munisípiu ne’e dehan, situasaun ne’ebé akontese iha Manufahi ne’e hetan tebes atensaun seriu husi governu sentral, ne’e duni estrada no ponte ne’ebé hetan estragus sei hadi’a iha tinan ida ne’e.
“Sei implementa tanba orsamentu retroativu ne’ebé mak agora governu sei aprezenta ba Parlamentu Nasionál ne’e inklui mós orsamentu kona-ba konstrusaun estrada sira ne’ebé hetan estragus iha munisípiu Manufahi,” nia hakotu.
1,443 total views, 3 views today
Bele hare Video Seluk :
Subscribe to Timorpost
