DILI (Timor Post)—Iha loron Sábadu dadeer, Funsionáriu Kooperativa balun hakat ba edefísiu ne’ebé rai dokumentu sesta bázika, iha Bairru Pité, hakfodak haree janela iha parte oin nakloke deskonfia ema deskoñesidu sobu no naok Diretora Aprovizonamentu nia laptop.
Prezidente ba programa Sesta Bázika, Tomas Gusmão, informa akontesimentu ne’e ema hotu la hatene, ema sobu iha loron ka kalan, maibé iha oras dadeer fusnionáriu sira tama servisu atu halo atividade balun haree janela rua iha oin nakloke hotu.
“Ami indetifika ona sasán ne’ebé lakon mak Laptop Direora Aprovisionamentu nian, deskonfia ema deskoñesidu mak tama”,Tomas informa kestaun hirak ne’e ba Timor Post, liuhosi telefone, Domingo (17/07).
Nia konta, hafoin haree janela nakloke, funsionáriu sira, kontaktu kedas superior, no Polisia Forensik hodi halo ezame, maibé seidauk, tanba sira sei iha atividade seluk mak presiza atende.
“Ami-nia edefisiu ne’e laiha moru, no laiha odamatan ne’ebé seguru, ami-nia fatin ne’e nakloke nune’e ita la hatene se maka tama hodi tenta sobu janela”, nia hato’o.
Nia konta, akontesimentu hanesan ne’e ba dala-rua ona, ema deskoñesidu tama foti projetór, maibé ema ne’ebé foti lori ba fan ikus mai konsege kaer toman.
“Ema ne’ebé momentu naok projetór ne’e, ema hosi liur, labarik sira hela besik edefisiu mak tama naok, maibé akontesimentu ida agora ne’e ita susar atu deskonfia, tanba fatin ne’e públiku ema livre asesu fasil”, nia hateten.
Enkuantu edefisiu kooperativa ne’ebé lokaliza iha Bairu-Pité, durante ne’e la koloka ema ruma atu sai seguransa ba iha fatin refere, tanba laran metin ba seguransa sivíl Palasiu Prezidensiál nian, tanba sira dala-ruma halo patrullamentu to’o iha efesidiu kooperativa .
Alende laiha seguransa, edefisiu refere iha elektrisidade, maibé ninia funsionamentu ladún la’o di’ak, kauza hosi elektrisidade mate lakan hodi fó implikasaun ba lampu sira hetan hotu estragu.
Iha sorin seluk, Diretór Jerál Promosaun Dezenvolvimentu Kooperativa, Francisco Xavier, rekoñese imajen ne’ebé tau iha sosiál media ne’e loos.
“Loos duni, ema naok teen iha Sesta kalan, sobu duni janela kooperativa nian, maibé seidauk hatene saida mak lakon tanba sei iha hela prosesu ezaminasaun hosi Polisia Forensik”, nia informa.
Enkuantu laptop ne’ebé lakon, iha laran dokumentu importante balun, maibé dokumentu Kona-ba sesta Bázika asegura.
Edefisiu refere, daudauk ne’e polisia dada ona police line, nune’e bandu funsionáriu labele tama iha fatin akontesimentu hodi hein rezultadu ezaminasaun.
1,101 total views, 3 views today
Bele hare Video Seluk :
Subscribe to Timorpost
