Laútem (timorpost.com) – Komunidade sira ezije ba Governu no Eatadu atu kria kondisaun di’ak ba Banku Nasionál Komérsiu Timor Leste (BNCTL) iha Postu Administrativu Lospalos, Munisípiu Lautém.
“Ami husu ba Governu liuliu Ministériu Finansas, katak kria kondisaun ba BNCTL iha munisípiu Laútem, Postu Lospalos nian, tanba fatin kloot no sistema atendimentu mós fraku,” informasaun ne’e hatete husi Komunidade, Vilanova Caetano, ba Timor Post iha BNCTL Lospalos, Segunda (09/01).
Nia dehan, hanesan preokupasaun ami nian, hakarak atu Governu relevante bele kria kondisaun di’ak, rekursu di’ak, hodi halo atendimentu ba públiku ho efikásia.
“Ami simu osan sempre dudu malu, no dala-ruma mós trata malu mak foin foti osan tanba de’it fatin kloot no sistema kleur-liu atendimentu ladi’ak”, nia hateten.
Tanba ne’e nia husu nafatin ba Governu lokál no nasionál, presiza melloria kondisaun fatin no sistema atendimentu iha BNCTL, bainhira, joven, adultus ka idozus ruma mai foti osan ka selu iha Banku, karik bele kria boa-atendimentu.
“Ami komunidade bain-bain maibé iha direitu atu ezije ba Governu lokál no nasionál, tanba BNCTL ba ema hotu-hotu nian, la’ós individu ka grupu ida nian,” nia lamenta.
Iha parte seluk Estudante ida hosi Universidade Nasionál Timor Loronsa’e (UNTL), Departamentu Finansas, Angelita Dias, hatete ko’alia kona-ba Kondisaun BNCTL la’ós instituisaun privadu ka grupu, maibé sai hanesan fatin komersiál ba ema hotu.
Tanba ne’e ohin komunidade Ezije ba Governu atu kria kondisaun di’ak iha BNCTL refere, atu bele asegura no seguru ba ema idade idozus sira atu foti sira nia osan, no sistema atendimentu mós tenke tau prioridade, tanba hanesan ema idozus laiha ona forsa atu hamriik, Sena-malu, dudu-malu mak foin simu osan.
“Ita tenke valoriza no dignifika direitu povu nian, tanba povu mak sai abut no huun nasaun nian, nune’e hanesan Governu ka Eatadu ida tenke servi loloos povu ne’e ho kondisaun favoravel,” nia esplika.
Kondisaun sira ne’e dala-ruma soran povu, tanba mai simu osan mós dudu-malu, hakilar-malu mak foin simu Osan, nune’e husu ba Governu relevante atu toma-responsabilidade ba kondisaun hirak ne’ebé komunidade enfrenta iha baze, liuliu kondisaun BNCTL iha munisípiu Lospalos.
Tuir Observasaun Timor Post asesu iha terenu, Banku Nasionál Komérsiu Timor Leste, ho kondisaun ladi’ak, tanba fatin kloot, sistema atendimentu mós ladi’ak, tanba ferik katuas bainhira mai simu sira-nia osan, sempre lina formatura, dudu-malu, istori-malu, mak foin asesu simu osan.
1,229 total views, 3 views today
