Dili(timorpost.com)—Sekretariadu Estadu Floresta (SEF), sempre fó apoiu karreta no motor ba Guarda Floresta iha munisípiu, atu halo kontrola másimu ba area protejidu iha terenu.
“Kada tinan, ami sempre tau osan hodi apoiu karreta no motorizada oferese ba Guarda Floresta iha munisípiu ida-idak, hodi halo kontrolu másimu iha area protejidu iha terenu, nune’e komunidade labele estraga ai-horis no rekursu naturais,” Diretor Jeral, Sekretariadu Estadu Floresta, Raimundo Mau, informa ba Timor Post, iha ninia kna’ar fatin Kaikoli, Kuarta (21/02).
Durante ne’e fó apoiu transporte ba Guarda Floresta iha munisípiu Baukau, Bobonaru, Covalima, Dili Manatutu, Vikeke no Lautem, hodi fasilita sira atu halo servisu, tanba area fronteira ema lori ai-kameli liuhosi dalan ilegál husi Timor-Leste ba Indonézia.
Objetivu husi apoiu transporte hirak ne’e, hodi halo operasaun másimu iha terenu, maski apoiu karreta no motorizada hirak la’ós kada Funsionáriu Guarda Floresta, maibé kada Diresaun ida-idak fasilita sira atu kontrola sasán ilegál ne’ebé komunidade sira halo iha terenu. SEF iha kompeténsia atu prende hodi prosesa tuir lei ne’ebé vigor ona.
SEF la’ós oferese karreta de’it, maibé sira apoiu motor no material hanesan komputadór, printer, kadeira no meza ba Guarda Floresta hodi fasilita no apoiu sira nia servisu.
Alende kona-ba karreta no motorizada inklui fasilidade hirak ne’e, balun sira apoiu iha tinan 2023-2024 nia laran, hodi garante funsionamentu atividade Guarda Floresta iha baze.
Antes ne’e, Xefe Sinior Guarda Floresta Atauru, Bernardo Soares, hatete, daudaun ne’e pesoal Guarda Floresta, na’in-lima de’it, maibé permananente na’in-ida no kontratadu na’in-hat.
“Ami hasoru dezafiu tanba menus rekursu umanu, laiha motorizada difikulta mós ba servisu kontrolu sasán ilegal ne’ebé komunidade pratika iha terenu,” Bernardo informa ba Timor Post, iha Salaun Administrasaun Villa-Maumeta.
Nia relata, pesoal guarda floresta na’in-lima de’it la sufisiente hodi bele kontrola rekursu naturais no area protejidu iha Atauru, Atauru ne’e rasik iha area protejidu no fatin turizmu domestiku no fatin ekoturizmu barak, nune’e presiza proteje no promove atu komunidade labele estraga.
“Ami nia preokupasaun maka seidauk iha edifisiu propriu, hodi utiliza atu halo servisu no mós problema seluk maka motorizada ka karreta hodi tula pesoal guarda sira, atu kontrola iha suku lima ne’ebé identifika area protejidu, hodi nune’e labele estraga rekursu naturais”, nia ezije.
Daudaun ne’e, membru Guarda Floresta uza edifisiu Postu iha Suku Beloi, maibé kondisaun aat hela, obriga tenke uza hodi halo servisu atu kontrola sasán ne’ebé tama ilegal.
Nia husu ba Sekretariu Estadu Floresta (SEF), Fernandinho Vieira, atu tau mós konsiderasaun ba problema hirak ne’ebé maka membru Guarda Floresta sira hasoru.
“Ami ezije ba Sekretariadu Estadu Floresta, se bele aloka pesoál Guarda Floresta balun mai iha Atauru, hodi fasilita servisu iha terenu, daudaun ne’e rekursu umanu menus difisil atu kontrolu iha area protejidu sira, husu mós atu distribui motorizada balun mai iha Atauru, hodi uza ba kontrola iha terenu”, nia husu.
Daudaun ne’e prepara hela hodi hatama proposta ba SEF, atu halo konstrusaun foun ba Edifisiu Guarda Floresta iha Atauru, nune’e sira prende komunidade estraga sasán ilegal ruma bele tau iha edifísiu.
Iha fatin hanesan, Xefe Suku Beloi, Adão da Costa Nunez, ezije ba Sekretariu Estadu Floresta, atu rekruta Funsionáriu Guarda Floresta, hodi aloka ba iha Atauru, nune’e bele kontrola rekursu naturais iha Atauru.
Atauru ne’e fatin turizmu barak, maibé presiza kontrola másimu, atu komunidade labele estraga ai-horis arbiru, ikus mai mosu erozaun no mós bele kontribui ba dezastre naturais.
3,951 total views, 3 views today
Bele hare Video Seluk :
Subscribe to Timorpost
