RAEOA (Timor Post)—Karreta Jo Marka Gran Max kór metan baku fila rezulta pasajeiru na’in-rua kanek todan, iha aldeia Oelkaem, suku Taiboco, Sub-rejiaun Pante-Makasar, Rejiaun Administrativu Espesiál Oe-kusi Ambenu (RAEOA).
“Dezastre ne’e mana ida ho tiu ida mak kanek todan, grasa maromak, ema mate laiha,” Timor Post asesu akontesimentu ne’e iha pájina Facebook Amanu Tiles, Sesta (22/07).
Hafoin karreta ne’e baku fila iha aldeia Oelkaem, kondutór ho naran kompletu Urbano Sila, husi suku Bene-ufe, halai lakon, maibé kondutór ninia dokumentu karreta hanesan karta kondusaun ho kartaun eleitorál rai hela iha karreta laran.
Karreta Gran Max metan baku fila, kuaze tuku 10:00 dadeer oras Timor-Leste, hafoin tula pasajeiru husi eis merkadu Tono, atu lori ba Sub-Rejiaun Nítibe.
Tan ne’e, Atone Oan sira sujere ba na’i-ulun sira, atu hadi’a estrada diresaun eis merkadu Tono ligadu ba Sub-rejiaun Nítibe nian.
Alende ne’e mós, Timor Post tenta atu dada lia ho Amanu Tiles, hodi kompleta informasaun kona-ba dezastre refere, maibé ninia facebook lá ativu.
1,361 total views, 3 views today
