DILI (timorpost.com) – Ministru Obras Públikas (MOP), Abel Pires da Silva, asina ona kontratu ho kompañia manán na’in sira kona-ba projetu konstrusaun ba moru protesaun mota husi Manlauana to’o mota Kasnafar no projetu tau aspal ba estrada husi Fatisi (bee tudak) nian ba to’o Sarlala Diresaun Dili ba Aileu.
“Asina tiha ona kontratu, ida husi Manleuana ba mota Kasnafar ne’e ha’u asina ona kontratu, ha’u haluha sira-nia naran maibé kompañia tolu mak manán, ne’e husi Manleuana to’o mota Kasnafar, ne’ebé semana oin ou semana ne’e sira halo ona. Parte Sarlala nian leten ita atu nahe aspalt ne’e semana ne’e sira hahú tiha ona mais semana oin ha’u sei ba halo inspesaun ba iha ne’ebá entaun tau aspal husi Sarlala mai besik Fatisi (Bee tudak nian) besik air terjun,” nia hateten, iha Palasiu Governu, Kinta (20/10).
Abel reforsa, projetu sira ne’e kompañia manán na’in sira mak sei implementa, ba estrada husi bee tudak Fatisi nian tuun mai kraik to’o mota Kasnafar ne’e sei loke tan tenderizasaun, konstrusaun estrada ne’e sei kompleta mós ho mota Kasnafar.
“Projetu ne’e ida manán mak sei halo, depois tender ba ida kraik ne’e, depois ponte tan ne’e kompleta ona, hadi’ak tan iha fatin sira ne’ebé naksobu ne’e, ne’e ha’u hanoin parte ne’ebá ne’e di’ak ona,” hateten Ministru Abel.
Nia subliña, tanba iha loron Segunda (17/10), ne’e nia parte asina ona (projetu konstrusaun ba moru protesaun husi Manleuanna to’o mota Kasnafar), tuir loloos Sesta liubá maibé kontratu mai tarde husi CNA.
“Entaun iha Segunda dadeer ne’e mak asina, depois ita intrega kedas ba kompañia sira para bele hala’o obra ne’e,” nia deklara.
Tanba normalizasaun ba estragus sira iha Kapitál Dili nian no munisípiu sira, Governu liuhusi Ministériu Obras Públikas, kontinua halo normalizasaun maibé daudauk ne’e MOP fó prioridade liu ba estrada husi Manleuana ba Kasnafar nian to’o Sarlala tanba estrada ne’e utiliza husi populasaun barak, tanba ne’e sei rezolve.
6,298 total views, 6 views today
Bele hare Video Seluk :
Subscribe to Timorpost
