DILI (timorpost.com) — Ministru Planu Ordenamentu (MPO), José Reis, hatete sira-nia Planu Estratéjiku Dezenvolvimentu balun la’o la tuur metas.
“Iha primeiru faze hatudu ita-nia prosesu la’o ladún tuir objetivu ne’ebé iha, porké iha metas balun la atinje, metas balun atinji ona, entaun prosesu sira ne’e mak ita tenta atu halo re-ajustamentu ba indikadór ne’ebé ladún klaru,” dehan José Reis, hafoin remata reuniaun komisaun inter-ministeriál ba Re-ajustamentu husi Planu Estratéjiku Dezenvolvimentu, tinan 2011-2030 iha Palásiu Governu, Tersa (04/10).
Nia dehan, iha planu estratéjiku dezenvolvimentu 2011-2030, liuhusi faze tolu, primeiru faze 2011-2015, segundu faze 2015-2020 no daudaun ne’e tama ona iha terseira faze Planu Estratéjiku Dezenvolvimentu nian, 2022-2030.
Ho ida ne’e ohin Primeiru Ministru, Taur Matan Ruak, prezide terseira reuniaun komisaun inter-ministeriál ba Re-ajustamentu husi Planu Estratéjiku Dezenvolvimentu (PED) tinan 2011-2030.
“Husi ekipa tékniku sentru planeamentu integradu halo aprezentasaun ba iha ezbosu re-ajustamentu, progresu de traballu ne’ebé hala’o tiha ona tinan kotuk, ohin halo aprezentasaun ba dala haat iha komisaun inter-ministerial, nune’e mós aprezenta kuadru ezbosu legal ida, kuadru legal ne’e ami aprezenta ho razaun ida iha rezolusaun 80/2021 ne’e husu planu ida ne’e tenke vinkulativu,” nia hateten.
Reis subliña, depois halo konsultasaun ho entidade no munisípiu to’o iha Rejiaun Administrativu Espesiál Oe-kusi Ambenu (RAEOA), husi pontu de vista, planu ne’e di’ak maibé la konsistente.
Entaun di’ak liu halo mós lei ida para bele kaer metin, atu nune’e bele iha konsisténsia iha implementasaun hodi atinje planu estratéjiku ne’e ezije.
“Aban ami sei lori opsaun lejizlativa polítika ne’e ba Konsellu Ministru hodi bele apresia, depois ida ne’e mak foin bele elabora artikuladu iha planu estratéjiku dezenvolvimentu ne’e rasik,” nia konfesa.
Atu hakotu nia dehan, maibé sei halo diskusaun nafatin kona-ba traballu PED nian ne’ebé seidauk tama ba faze finál, agora sei iha ezbosu preleminariu ne’ebé tenta atu halo hotu iha fulan rua tuir mai.
1,445 total views, 3 views today
Bele hare Video Seluk :