MANUFAHI—Reprezentante amu bapa iha Timor-Leste Marco Sprizzi halo vizita ba Mother Mary Home Care Center (MMHCC) iha aldeia Sarmata, suku Letefoho, postu administrativu Same, munisipíu Manufahi.
Iha vizita ne’e, reprezentante amu bapa iha Timor-Leste Marco Sprizzi hateten, sente kontente tebes bainhira mai hamutuk ho sarani sira iha fatin MMHC no la imajina bainhira reprezenta amu bapa mai iha imi le’et hodi lori mensajen amu bapa Francisco nian ba ita bo’ot sira,
“Bainhira fila ha’u sei konta tuir saida mak ha’u hare no hetan iha MMHCC ba amu Bapa Francisco atu nune’e amu bap abele tau iha amu bapa nia fuan maybe ha’i fiar katak MMHCC iha tiha ona kristu nia fuan”dehan Marco Sprizzi iha Sarmata, Same, Sabadu (23/12).
Reprezentante mau bapa ne’e rekoñese asaun ne’ebé profesora Filomena da Costa (Mimi) halo ne’e lolo’ós ne’e hanesan maromak nia obra.
“Maske iha fatin balun ita rona mosu problema ho violensia maybe ita ba fali iha fatin seluk ita hare ema balun ho fuan no kapasidade naton no la husu buat ida hodi hahú halo buat ki’ik sai ba bo’ot no ida ne’e ema hotu la hanoin to’o”dehan nia.
Monsehor ne’e dehan, iha vizita ne’e nia rasik sente haksolok bainhira hare sarani ho labarik sira simu ho haksolok no hamnasa, neduni ba MMHCC maromak nia tulun sei habo’ot liu tan ninia existensia.
“Buat nbe’ebé profesora Filomena halo ne’e sai hanesan ezempu diak ida no hakarak dehan deit katak asaun ida ne’e la presiza madre no padre deit mak halo maibé buat ne’ebé nia halo ne’e hanesan sarani hatudu no halo ona ezemplu ida diak hatudu ba ema hotu”nia hateten.
Neduni buat di’ak ne’ebé profesora Filomena da Costa (Mimi) halo liu husi nia inistiva ne’e hanesan ezempu ida ba joven sira atu banati tuir hodi halo diak barak liu tan ba igreja no ba nasaun ida ne’e.
“Ba asaun refere, reprezentante amu bapa husu hotu-hotu atu fó apoiu no labele hare de’it nia mesak maibé atu tulun nia atu hodi halo barak liu tan husi buat ne’ebé nia hahú ona”nia rekomenda.
Portantu ba uma MMHCC konserteza iha amu bapa nia fuan no sei informa baa mu bapa atu reza atu nune’e fatin ne’e kontinua existi iha Sarmata, suku Letefoho, postu administrativu Same, munisipíu Manufahi.
Fatin hanesan koordenadora uma Madre Mary Home Care Center (MMHCC) Filomena da Costa (Mimi) agaradese tebes ba reprezentante amu bapa ninia vizita ba fatin MMHCC.
“Ho ita nia vizita ne’e ba ami nia fatin hanesan amu bapa Francisco no ohin ami sente hanesan ami besik lo’os ho vatikanu”dehan Filomena.
Fundador no inisiador ne’e konta, inisiu fatin refere ho naran Mother Teresa Home Care (MTHC) maibe liu tiha tinan ida ho balun labale uza ona naran mother Teresa tanba komunidade la aseita atuza santa Teresa nia naran ba kualker grupu no saida de’it ho ida ne’e mak trasforma fali ba Mother Mary Home Care Center (MMHCC).
“Fatin ne’e ami la tau hanesan orfanatu maibé home care tanba ami lakoi halibur deit labarik ne’ebé orfanatu tanba sei iha labarik seluk ne’ebé la’ós kondisaun orfantu maibé maibé balun familia kbi’it la’ek hodi labele tulun ona ba eskola, balun iha iha familia ema barak lo’os no baluna laiha familia hodi eskola”nia relata.
“MMHC hahú iha tempu pademia Covid-19 no momentu ne’eba komesa voluntariamente ho komunidade halibur fatuk no rai henek husi mota ne’ebé besik mai tau nune’e hodi halo konstrusaun, bainhira ha’u ho mana Ana Paula tau ideia hamutuk oinsa atu halibur labarik sira”nia esplika.
Maibé hafoin prosesu lao to’o osan laiha ona nune’e desidi ha’u rasik halo kreditu iha banku BNCTL husi salariu rasik no kada fulan banku koa salariu hodi taka kreditu atu nune’e hodi kontinua konstrusaun tanba labarik sira atu mai hela ona.
Profesora ne’e rekonese katak, iha konstrusaun nia laran nafatin hasoru nafatin dezafius kona-ba orsamentu maibe ho maromak nia grasa media mai halo publikasaun sai fatin ne’e halo ema barak mai vizita no hetan apoiu ai-han no roupa ba labarik sira kontinua to’o ohin loron.
“Uma ne’e halo ho de’it sala 4, sala ida ba fatin reza, ida ba labarik feto sira hodi toba, ida ba mane sira no ida bah an fatin inklui sai mós hanesan fatin aprende iha tempu livre maibé iha maluk balun ne’ebé durante ne’e sempre akompaña ikus mai halo konstrusaun ida ba hari’is fatin ho sala 4”nia relata.
Nune’e tau ona ba planu atu aumenta tan sala de aula, kapela no moru haleu maibé seidauk iha osan seidauk iha atu hodi halo konstrusaun ba planu refere atu nune’e bele utilkiza ba labarik sira.
“Maibé foin lalais husi nasaun Tailandia loke kompetisaun ba mellores profesores ne’ebé ho idea kreativu, inovativu no inspirativu kada nasaun nasaun ida-ida maibé grace maromak hau bele hetan premiu refere iha Tailandia husi precesa Maha Zakri iha fulan-Outubru liu ba ho osan dollar rihun 10”nia aprezenta.
Husi orsamentu refere ba dadaun ne’e hodi halo hela konstrusaun ba fatin aprende ba labarik sira no foin lalais hetan tan premiu kona-ba Diretus Humanus Sergio Viere de Mello hetan premiu ho osan dollar rihun 10 no premiu refere sei uza ba halo fatin kapela ida atu nune’e ho labarik sira bele hodi reza.
Tuir observasaun Timor Post nota katak, iha vizita ne’e Monsehor Marco Sprizzi tau fatuk dahuluk ba fatin konstrusaun kapela MMHC atu nune’e hodi halo konstrsaun hafoin remata festa natal no tinan foun.(lcl).
852 total views, 3 views today
Bele hare Video Seluk :
Subscribe to Timorpost
