MANUFAHI (timorpost.com)–Tribunal Distritál Suai (TDS) aplika prizaun preventiva ba arguidu CB ne’ebé mak halakon feen kaben Rosalina Clara ninia vida iha iha suku Daisua, postu administrativu Same, munisípiu Manufahi.
Komandu Polisia Munisípiu Manufahi liuhosi ekipa Investigasaun Kriminál, submete ona suspeitu ho inisiál CB ne’ebé deskonfia komete kazu omisídiu hodi oho nia feen kaben ba iha TDS hodi submete ba prosesu primeiru Interrogatóriu.
“Horisehik Tribunál Distritál Suai, liuhosi julgamentu primeiru interrogatóriu aplika medida koasaun prizaun preventiva ba arguidu CB tinan 47 ne’ebé oho nia feen rasik Rosalina Clara, iha aldeia Riatu, suku Daisua, postu administrativu Same”, Komandante PNTL Manufahi, Joni Viana das Regras, hateten ba jornalista sira, Tersa (21/02/2023).
Tuir Joni, Rosalina Clara husik hela nia oan na’in-neen, kompostu hosi feto na’in-tolu no mane na’in-tolu, enkuantu arguidu agora detein ona iha Tribunál Distritál Suai hodi hein prosesu julgamentu tuir mai.
“Agora mate isin oras ne’e daudaun sei halo prosesu autópsia iha Ospitál Nasionál Guido Valadares (HNGV)”, nia deklara.
680 total views, 3 views today
