DILI (timorpost.com) – Feto bonita ida tuur iha kadeira ne’ebé foru ho hena mutin hodi fihir ba mai iha serimónia ida. Afinál feto ne’e profesora ida.
Feto isin mutin no fuuk been, ne’ebé hatais vestidu tais Timor nian ho kór mean, ne’ebé falun ho kazaku metan husi li’ur, konversa hela ho nia belun profesora sira iha Eskola Sekundária Jerál Públiku (ESJP) Suai.
Feto ne’e mak se?………Nia mak Maria Imaculada ho nia naran estimadu MACU, hanesan profesora eskola Sekundária Jerál Públiku, iha postu administrativu Suai, munisípiu Covalima.
Maria sai profesora, tanba tuir aman ninia ain fatin, ne’ebé hanesan profesór, no nia aman hakarak nia oan feto tenke tuir ninia ain fatin, atu nune’e, aban bairua aman laiha ona karik, oan bele troka fali aman hanesan manorin na’in, hodi tranzmite siénsia ne’ebé aprende durante estudu, ba ema seluk ne’ebé presiza, liuliu estudante sira.
“Ha’u sai profesora tuir ha’u nia aman nia ain fatin, ne’ebé hanesan manorin na’in husi tempu Portugés to’o ukun-an, no tuir ami nia lisan Bunak Suai nian, oan feto boot bainhira forma ona família, tenke hela iha uma, ne’ebé inan-aman halo ba, ami oan feto mak iha direitu ba sasán uma laran nian, entaun ha’u nia aman hakarak ha’u eskola, tenke estuda iha area edukasaun nian, nune’e bainhira termina estudu, ha’u tenke sai profesora hodi troka fali aman nia fatin,” Oan doben husi Justino Gusmão hanesan manorin na’in no Natalina Cardoso ne’e dada lia ho jornalista Timor Post iha ESJP Suai, Kinta (04/05).
Maria ninia aman mak sai matadalan ida ba ninia susesu iha edukasaun, maski seidauk perfeitu, maibé bele ona responde ba nesesidade família nian, liuhusi servisu ne’ebé nia hala’o loron-loron.
Bunak-oan ne’ebé moris iha loron 15, fulan Marsu, tinan 1986, ne’e bainhira sei eskola iha primária, nia iha ona mehi hakarak sai doutora ka sai enfermeira, para bele atende pasiente sira ne’ebé moras, maibé ho tempu ne’ebé la’o lais liu, loron ba semana, ba fulan no tinan, mehi ne’e hela ho istória de’it no la sai realidade.
Mehi foun mosu daudaun, nia hakarak sai fali manorin na’in tuir ninia aman nia ain fatin hodi tranzmite siénsia ba estudante sira.
Tuir nia, siénsia importante hodi muda ema nia hanoin no mentalidade iha sosiedade nia leet, tanba siénsia maka sai xave importante iha mundu tomak husi siénsia bele dezenvolve nasaun ne’e sai dezenvolvidu.
“Maski la realiza mehi pasadu nian sai doutora, maibé ha’u nafatin agradese ba Maromak, ba buat di’ak tomak ne’ebé fó mai ha’u, liuhusi esforsu tomak, husi inisiu, ikus mai realiza ha’u nia mehi, sai profesora,” Maria haktuir.
Enkuantu, feto potensiál husi munisípiu Covalima ne’e, hahú ninia estudu iha Eskola Primária Tali-uan Suai, iha tinan 1992-1997, kontinua eskola Pre-sekundária Katólika Nossa Señora Imaculada, Ermera, iha tinan 2001-2004.No kontinua ninia estudu iha Universidade Nasionál Timor Lorosa’e (UNTL), Fakuldade Edukasaun Arte no Umanidade (FEAH), Departamentu Kímiku, iha tinan 2004-2015.
Mezmu nia seidauk termina estudu no altura ne’ebá sei iha universidade, maibé tanba grasa Maromak nian, entaun sai ona profesora hodi hanorin.
Nia hahú hanorin iha eskola sekundária públiku, iha Suai, iha tinan 2011, lori matéria kímika, depois fahe tempu livre ba hanorin fali eskola sekundária Katólika Kristal, maibé, la kleur de’it muda fali mai hanorin iha sekundária jerál iha Suai, iha tinan 2021, mai to’o ohin loron lori matéria kímiku.
“Ha’u kontente ho kna’ar profesora nian hodi tranzmite siénsia, ne’ebé ha’u aprende husi matenek na’in sira ba estudante sira iha sala laran no mós kontrolu no sai belun ba estudante sira, atu nune’e estudante sira labele ta’uk, atu aprende siénsia ne’ebé profesora hanorin,” nia konta tuir.
Aleinde ne’e mós, sai profesora hanesan sai inan ida hodi kontrolu estudante sira, nune’e mós sai hanesan inan ida, hodi tau matan no hakbesik ba estudante sira bele fó saida maka sira seidauk hatene ba profesora, hodi ajuda sira hodi aprende siénsia di’ak liután.
“Ha’u agradese ba inan aman nia apoiu tomak husi parte material no espirituál hahú inisiu to’o termina estudu iha nivel lisensiatura ikus mai sai hanesan profesora tanba suporta finanseiru husi inan-aman tanba ne’e agradese no obrigadu ba sira nia apoiu tomak,” nia hateten.
Maski moris ne’e la riku liu, pelu menus husi saláriu ne’ebé nia hetan kada fulan bele responde ona ba nesesidade família uma laran nian no bele halo kontente ba nia inan-aman.
Portantu, Suai oan ne’e iha maun-alin hamutuk na’in-lima, kompostu husi feto tolu, mane rua. Sira na’in-lima ne’e, na’in-haat remata estudu iha nivel lisensiatura no hetan ona servisu no alin ikun maka sei eskola sekundária.
Enkuantu, MACU ho nia fuan sorin Paulo Guterres Amaral, sira na’in-rua iha ona oan hamutuk na’in-haat, ne’ebé mak sei eskola iha pre-sekundária no eskola primária.
3,687 total views, 21 views today
Bele hare Video Seluk :
Subscribe to Timorpost
