DILI—Ministru Komérsiu no Indústria (MKI) ho Governu Reinu Unidu (UK) halo diskusaun kona-ba Timor-Leste nian produtu Orijinál.
Ministru Komérsiu no Indústria, Filipus Nino Pereira, informa enkontru ida ne’e kontinuasaun servisu ne’ebé antes ne’e iha ona, ida hametin kooperasaun entre nasaun rua ne’e ba oin atu ko’alia kona-ba Timor-Leste nia produtu orijinál maka saida.
“Hasoru malu ho Embaixador UK (Reinu Unidu) iha Jakarta Indonézia ami ko’alia kona-ba Timor-Leste nia produtu orijinál ne’e saida, tanba ne’e ha’u dehan Timor nia produtu orijen ne’e maka Kafé hodi esporta ba rai li’ur”, Filipus Nino Pereira, informa ba Timor Post iha nia servisu fatin MKI, Bebora, Tersa (21/052024).
Membru Governu ne’e relata, embaixada mós ko’alia kona-ba Kafé Timor agora fa’an ona iha merkadu UK no komunidade sira mós konsumu iha nasaun refere.
Tanba ne’e maka sira mai hodi ko’alia atu halo preparasaun ba lejizlasaun oinsá atu fasilita atividade komérsiu nian tama iha ASEAN.
Aleinde ne’e mós, ba oin sei harii Embaixada United Kingdom iha Timor-Leste hodi hametin liu tan kooperasaun di’ak ho MKI hodi fasilita formasaun ba membru sira prepara-an tama iha ASEAN.
Ikus liu agradese ba Governu Reinu Unidu ne’ebé hakarak servisu makaas hodi apoiu Governu Timor-Leste liu-liu MKI hodi implementa regra orijen hodi halo atividade negósiu iha rai laran no rai li’ur.
Iha sorin seluk, Embaixadór Reinu Unidu ba Indonézia, Dominic Jermey, reforsa, enkontru hamutuk ho MKI hodi ko’alia kona-ba produtu orijen Timor nian hanesan Kafé no produtu seluk tan.
Enkontru ne’e hanesan kontinuasaun de’it, tanba antes ne’e Reinu Unidu halo kooperasaun ho Governu Timor-Leste liga produtu lokál.
936 total views, 12 views today
Bele hare Video Seluk :