DILI, (Timor Post.com)—Banco Nacional de Comércio de Timor-Leste (BNCTL, S. A), realiza Futsal ho taxa BNCTL Cup hodi komemora aniversáriu ezistensia BNCTL nian iha Timor-Leste ba dal-XIII.
Aniversáriu BNCTL sei realiza iha loron 11 Fulan Jullu 2024.
Tuir Prezidente Konselu Administrasaun BNCTL, Lúcia da Cruz Flor hatete, objetivu husi BNCTL Cup oinsa atu hametin liutan lasu parseria ho instituisaun seluk, promove servisu no produtu BNCTL nian, hamoris espiritu desportivu ba joven sira.
Parte seluk hosi objetivu BNCTL Cup ne’e mós oinsa atu hamoris espiritu solidariedade esportizmu kria unidade hodi atinje karizma desportu ne’ebe eziste kada pesoal.
“Jogu futsal hanesan parte ida hodi dezenvolve karakter responsabilidade no servisu ekipa. Ne’e duni, liu husi torneiu ida ne’e,” ami espera bele hamoris espiritu solidaridade, esportizmu ba pesoal ida nian, maturidade ba jogu no unidade entre jogadores ho adeptu sira”. Haktuir Konselu Administrasaun BNCTL, Lúcia da Cruz Flor iha serimónia Abertura Torneiu Futsal “BNCTL Cup” ba Aniversáriu BNCTL nian iha Bebora, Sabadu loraik (25/05/2024),
Nia reforsa, hosi buat sira ne’e hotu, importante liu mak oinsa kria ambiente neʼebé enkoraja moris saudável ba ema hotu.
Iha jogu futsal ne’e sei partesipa hosi kompañias nasionál no internasional ho total ekipa 66 kompostu hosi ekipa feto 32 no ekipa mane 34.
BNCTL sei oferese prémiu ne’ebé mak atrativu ba manan nain sira hodi enkoraja jogadór sira atu joga ho espíritu ne’ebé diak no esplora sira ninia talentu iha área desportu nian liliu iha futsal.
“Prémiu ba manan-nain mak hanesan, manan nain dahuluk ba feto no mane, sei hetan USD5,000.00/kada ekipa; Manan nain daruak ba feto no mane, sei hetan USD 3,000.00/kada ekipa; Manan nain datoluk ba feto no mane, sei hetan USD 2,000.00/kada ekipa; Mellor markadór ba feto no mane, sei hetan USD250.00/kada ema; Mellor guarda-redi ba feto no mane, sei hetan USD250.00/kada ema”. Nia informa.
Valór hosi prémiu hirak ne’e hanesan meiu ida BNCTL hakarak oferese fila-fali ba ita nia kliente ka públiku sira. Aproveita oportunidade ida ne’e, BNCTL hakarak husu deskulpa tanba labele konvida ekipa barak liu iha torneiu ne’e. Maibé ami mos kompromete katak iha tinan oin sei halo selesaun ho rigorozu fulan tolu antes ba ekipa sira atu nune’e bele envolve ekipa barak liu-tan.
To’o Dezembru 2023, BNCTL mobiliza ona depozitu hamutuk >$585 milloens, no konsede ona kreditu >$297 milloens ho nia ativa $738 milloens no atende hela >486,294 mil klientes. BNCTL estabelese ona nia Sukursal hamutuk 13 iha Munisipiu hotu inkui Ajensia 11. BNCTL mós hari ona kooperasaun ho Banku Korespondensia na’in 9, iha Banku Movėl hamutuk 15, ATMs 60, no POS 161 iha teritóriu tomak. BNCTL fazeadamente nakfilak nia an hanesan “banku modemu” no halo servisu dijitais.
“Ho progresu hirak ne’e, ami espera katak sei hetan konfiansa boot liu tan husi públiku hodi kontribui ba kresimentu ekonómia no dezenvolvimentu Timor-Leste. BNCTL konta nafatin apoiu husi prezadus klientes, Estadu Timor-Leste nu’udar úniku Asionista, BCTL nu’udar regulador, entidades estadu, setor informál no privadu sira”. Hakotu.
1,446 total views, 3 views today
Bele hare Video Seluk :