DILI, (TimorPost.com)—Banku Dezenvolvimentu Aziátiku (ADB) ho Governu Timor-Leste liu hosi Ministeriu Transporte no Telekomunikasaun (MTT), lansa ona Planu Mestre Transporte Públiku Timor-Leste (TLPTMP) hodi tulun nasaun ne’e atinje vizaun kona-ba sistema transporte públiku ida-ne’ebé iha futuru sei prepara hodi suporta kresimentu ekonómiku, dezenvolvimentu urbanu no kualidade moris iha nasaun laran tomak.
Dokumentu planeamentu ba tempu naruk ne’e fornese roteiru ida ba kresimentu no dezenvolvimentu transporte públiku lokál iha futuru.
“Planu mestre ne’e sei asegura katak ema iha asesu ba sistema transporte públiku ida ne’ebé efisiente, seguru, inkluzivu, reziliente ba klima no sustentavel, dehan Diretór Nasionál ADB Timor-Leste, Estefánia Dina, ba Jornalista sira iha fatin Timor Plaza, Kinta, ( 23/05)
“Planu mestre ne’e mós sei kontribui atu alkansa dezenvolvimentu ho karbonu kiik no kresimentu enerjia ne’ebé efisiente iha setor transporte, tuir Timor-Leste nia Kontribuisaun Nasionál Determinadu 2022-2030.”
TLPTMP fasilita transformasaun ba transporte públiku iha sidade laran no ba munisípiu liu husi revizaun ba rute transporte públiku ne’ebé eziste, hadi’a instalasaun bis para fatin no terminál sira, no estabelese rute foun ba bis públiku sira.
TLPTMP Fó mós orientasaun ba organizasaun sira ne’ebé jere no opera sistema transporte públiku, Ida ne’e hein katak sei hametin Dili nia pozisaun hanesan sidade kapitál nasaun nian, nu’udar sentru transporte, no mós hadi’a asesu ba servisu públiku no oportunidade ekonómiku ba Timoroan sira liuhusi transporte públiku.
Iha fatin hanesan, Ministériu Transporte komunikasaun, Miguel Marques Gonçalves Manetelu hatete , Nesesidade ba transporte públiku iha Timor-Leste sai hanesan asuntu ida-ne’ebé maka importante tebes, liuliu nesesidade atu dezenvolve no habelar transporte públiku ho kualidade ho rekursu rai no dezenvolvimentu ne’ebé limitadu.
Iha mós nesesidade atu dezenvolve sistema transporte públiku no servisu sira ne’ebé reziliente ba risku mudansa klimátika, atu responde ba nesesidade hirak ne’e, Ministériu Transporte no Komunikasaun, ho apoiu husi ADB, dezenvolve ona TLPTMP.
ADB iha kompromisu atu alkansa Ázia no Pasífiku ida-ne’ebé prósperu, inkluzivu, reziliente no sustentável, iha tempu hanesan mós atu alkansa ninia esforsu sira hodi halakon pobreza estrema iha nasaun ne’e.
ADB harii iha tinan 1966, ho membru nasaun 68-no 49 husi rejiaun ne’e.
993 total views, 6 views today
Bele hare Video Seluk :