MANUFAHI-Koordenadór eskola Ensinu Báziku Filial (EBF) Liurai, Luís Mali informa, biblioteka eskola ho kondisaun ne’ebé la dun di’ak nune’e tempu udan sempre difikuldade boot ba professor sira.
Nia hateten, problema ne’ebé eskola hasoru mak kondisaun biblioteka la dun di’ak no kondisaun refere hahú kedas iha tinan 2000 hodi mai to’o agora, kuaze tinan 10.
“Problema mak hanesan kalén uma leten kuak nune’e to’o tempu udan boot bee tama mai laran hodi habokon livru dixiplina” dehan koordenadór Luís ba Timor post iha Liurai, Segunda (06/03).
Aleinde ne’e armáriu la sufisiente hodi tau livru dixiplina ne’ebé profesór sira hodi hanorin estudante loron-loron. Tanba ne’e livru rai de’it iha fatin ne’ebé la dignu no tau la tuir ninia fatin.
Nia haktuir “bainhira tempu udan ha’u ho profesór sira tenke hi’it livru sira ne’e hodi ba mai atu buka fatin ne’ebé maran hodi asegura livru”.
“Maski livru ba dixiplina hodi hanorin estudante sufisiente maibé problema laiha armáriu hodi asegura livru refere” nia aprezenta.
Tanba ne’e rekomenda ba Ministériu Edukasaun Juventude no Desportu (MEJD) atu hare problema ne’e, selae kada tinan governu liu husi ministériu bele apoiu beibeik livru mai eskola maibé fatin laiha susar uitoan atu asegura.(lcl).
970 total views, 3 views today
