Timor Post (17/09/2020)—Derepente de’it, iha oras tuku 10 kalan, ahi han uma tali boot ida, dapur no uma ba manu Pombu nian ida motuk.
Uma na’in la konsege salva sasan uma laran tanba ahi lakan maka’as no lalais tebes.
Luis Pereira Tilman nu’udar uma nain ba Timor Post, Kinta (17/09/2020) haktuir, nia rasik ba tiha servisu iha Sentru Peskiza Agrikultura Betano. Derepente ahi han no nia simu informasaun hodi halai to’o uma maibé labele ona halo buat ida.
“Sira kontaktu dehan ahi han uma, ha’u sai husi servisu fatin to’o mai uma mós labele salva ona sasan uma laran,” Luis hatete ba Timor post iha fatin akontesementu Aldeia Be’e Metan, Suku Betano, Postu Administrativu Same, Munisípiu Manufahi.
Nia dehan, sasan uma laran kuaze ahi han motuk inklui fore mungu karon 7 ho kilo 350, osan dolar rihun 1, roupa no sasan dapur uma laran.
“Ami nia sasan uma laran ahi han motuk hotu. Buat hotu la salva ami nain hitu sai ho de’it roupa isin lolon. Ami nia roupa iha armari motuk hotu,” Luis haktuir.
Observasaun Timor Post haktuir, hafoin akontesementu ekipa Jestaun Risku Dezastre Munisipíu Manufahi to’o kedas fatin akontesementu hodi halo verifikasaun.
Tuir planu, vítima sira sei hetan apoiu emerjénsia iha loron Sesta (18/09/2020).
Jornalista: Luis Casmeiro Lopes
623 total views, 3 views today
Oinsa Ita nia Reaksaun iha Notisia Nee?
You have reacted on “Derepente De’it Ahi mosu iha Uma ida iha …”
Bele hare Video Seluk :
Subscribe to Timorpost
