MANUFAHI (timorpost.com)-Komisaun Nasionál Eleisaun (CNE Sigla-Portugés) halo formasaun durante loron tolu iha Manufahi hodi eleva no hasae koñesementu Ofisial Supervizaun Eleisaun (OSE) na’in atus 137 ne’ebé rekruta hodi halo supervizaun ba eleisaun parlamentár.
Ba jornalista sira, Komisáriu CNE, Alcino de Araújo Barris esplika, formasaun ne’e ba rekruta sira ne’ebé atu halo kna’ar nu’udar supervizaun ka supervizór hamutuk ho CNE halo supervizaun ba aktus eleitoral iha eleisaun.
Tanba ne’e formasaun ne’e CNE fahe matéria ne’ebé adekuadu durante loron 3 atu nune’e OSE sira bele hatene kona-ba kna’ar CNE hodi bele hahú ona halo supervizaun ba kampaña eleitorál ne’ebé partidu polítika sira hala’o tuir oráriu durante loron 30.
Durante loron 30 nia laran partidu polítika sira sei tun ba iha munisípiu, postu administrativu no suku ho ida ne’e OSE sira komesa halo ona sira nia kna’ar mak halo akompañamentu ba partidu polítika sira tantu kampaña, door to door inklui liu husi kanál media sira.
“Ne’e duni OSE mak sei halo akompañamentu no buat hotu-hotu tenke la’o tuir regra ne’ebé estabelese kona-ba aktus eleitorál, akompaña material sensitivu ba iha postu no sentru votasaun ne’ebé instaladu ona, akompaña eleisaun to’o akompaña material sensitivu husi fatin eleisaun ba munisípiu inklui to’o kontajen votu” nia dehan.
Liu husi formasaun ne’e OSE sira bele iha koñesementu kona-ba sistema eleitorál, krime eleitorál nune’e sira bele halo serbisu másimu no efikasia.
“Ha’u husu ba OSE sira atu halo kna’ar ho independente no profisionál hodi garantia eleisaun ne’e la’o ho di’ak, susesu, kredibel no se sé mak manan hotu-hotu nian no lakon mós hotu-hotu nian” nia dehan.
Fatin hanesan Ofisial Supervizaun Eleitorál (OSE), postu administrativu Turiskai, Igildo Caldeira da Costa hatutan, formasaun ne’ebé partisipa ho tema eleva koñesementu hodi prepara a’an ba prosesu eleisaun parlamentár tuir mai.
“Ami garantia katak ho formasaun ne’e bainhira ami tun ba iha terenu labele iha fallansu, maski iha fallansu maibé presiza iha kolaborasaun di’ak hodi asegura eleisaun inklui buat hotu tenke la’o tuir ninia prosesu” nia hakotu.(lcl).
1,398 total views, 3 views today
