Díli (timorpost.com) – Amu selebrante misa Domingu (19/02/2023), iha estasaun misionáriu nossa Senhora das Graças Manleuana, Padre Robert Faldeiro, iha nia omilia hatete agora tama ona iha loron kuarezma sarani sira tenke halo sakrifísiu.
“Kuarta feira Sinzas ita tama ona iha loron kuarezma, tanba ne’e husu ba sarani halo sakrifísiu liuhusi jezun, halo orasaun, hadeer an hodi hamoos sala, hodi moris tuir maromak nia ukun fuan hadomi ema seluk hanesan ita-nia an rasik”, nia hateten.
Padre ne’e dehan, ema ne’ebé halo at ódiu ema seluk nia sei la hetan justisa iha maromak nia futar oin, tanba nia moris gosta hanoin at ba ema seluk nia sei la hetan salvasaun.
“Tanba ne’e maka ema tenke iha rasionál iha hanoin ne’ebé di’ak tuir doutrina igreja no tuir maromak nia ukun fuan sanulu hadomi ema seluk hanesan ita-nia an rasik atu nune’e bele hetan salvasaun husi maromak”, padre esplika
Pe. Robert hatutan, hanesan sarani tenke halo sakrifísiu iha loron kuarezma halo orasaun jezun, hadeer an ho fuan no laran mós hodi simu Jesus Kristu ne’ebé mate iha krús tanba ema nia sala.
Tanba ne’e husu, sarani sira ne’ebé hasoru problema oi-oin presiza hakbesik ba igreja hodi hasae orasaun ba Na’in Feto ho São José ho nia oan Jesus iha tempu kuarezma nia laran hodi hetan salvasaun husi maromak.
“Tanba Jesus maka ai-hun ba ema hotu la fihir kiak eh riku nia hadomi ema hotu tanba ne’e husu sarani atu fiar nafatin iha Jesus hodi hasae orasaun ba nia hodi hetan salvasaun”, nia hakotu
1,234 total views, 3 views today
Bele hare Video Seluk :
Subscribe to Timorpost
