Manufahi (timorpost.com) — Relasiona ho udan boot iha loron hirak liubá hamosu rai halai fó impaktu ba estrada lokál ligasaun aldeia Ai-tuha ba aldeia Bubulora.
Tuir Francisco Maia, atual profesór eskola sentral Fahi-nehan, haktuir udan foin lalais ne’e rezulta estrada lokál ida iha ligasaun aldeia Ai-tuha ba aldeia Bubulora, suku Bubususu, postu Administrativu Fatuberliu, Munisípiu Manufahi, estragus no besik atu kotu.
Nia dehan, erosaun ne’e fó impaktu bo’ot ba komunidade sira labele halo movimentu ain ba mai liuliu ho motorizada.
“Erosaun ne’e alende impaktu ba estrada inklui komunidade ne’ebe hela besik liu fatin akontesementu rai monu ne’e iha uma-kain rua inklui mós sede aldeia Bubulora,” nia hateten ba Timor Post, Segunda (20/02/2023).
Sorin seluk Xefe Suku Bubususu Estanislao Borges, relata akontesimentu ne’e ligasaun estrada aldeia Ai-tuha no aldeia Bubulora kotu totál.
Nia dehan, husi akontesementu udan refere fó ameasa makas estrada no ameasadu maka’as ba komunidade uma kain-4 ne’ebé hela besik iha fatin akontesimentu.
“Ho situasaun ne’e ha’u rekomenda ba komunidade sira atu muda sai husi fatin refere”, nia subliña.
Nia hatutan, akontesimentu ne’e komunidade uma-kain ida distánsia besik liubá fatin risku, karik akontese udan nafatin hakarak ka lakoi komunidade sira tenke muda sai husi fatin ne’e.
Ho akontesementu ne’e hanesan Autoridade másimu suku halo ona levantamentu ba dalan foun ka loke estrada foun ida tanba estrada ne’ebé iha kotu totalmente hodi difikulta movimentu tantu transporte no lao ain.
Molok hakotu, Xefe Suku Estanislao, rekomenda ba Ministériu Obras Públiku (MOP), atu tau konsiderasaun ba asuntu refere iha suku Bubususu ligadu ba iha aldeia 5 kuaze a’at total, iha Postu Administrativu Fatuberliu, Munisípiu Manufahi.
1,447 total views, 3 views today
Bele hare Video Seluk :
Subscribe to Timorpost
