DILI, (timorpost.com)— Timoron kontinua “hobur” Notariadu Ministériu Justisa (MJ) nin iha Bebora-Dili, loron 22 fulan-Novembru 2023 hodi halo pasaporte. Sidadaun balun deside ba notariadu iha madrugada no tenke pasiénsia hein to’o edifísiu loke mak tama para trata dokumentus.
“Ami mai madrugada tuku 2 dader hein iha liur foin odamatan loke ne’e mak ami hadau malu tam mai ne’e, maibé to’o agora sei forma hela”, Benigno Pereira, informa ba Timor Post iha Notariadu, Bebora-Dili.
Nia hatete, tenke mai sedu tanba tuir informasaun tratamentu pasaporte kada loron ba de’it ema 140.
“Ami tenke mai sedu tanba tuir informasaun ne’ebé ami rona ne’e dehan loron ida trata de’it deokumentu ba ema na’in 140 nian de’it” nia hatete.
Durante ne’e Timoroan barak mak trata dokumentus hodi buka servisu iha rai-liur inklui hirak ne’ebé hetan oportunidade ba servisu iha Austrália no Korea, inklui iha fatin seluk tan, tanba ne’e hakarak ka lakohi tenke forma para halo pasaporte.
“Objetivu halo pasaporte ne’e atu trata dokumentus ba buka servisu iha rai-liur”, Benigno afirma.
Iha fatin hanesan, Julmira Gusmão, hato’o preokupasaun ne’ebé hanesan no kontinua esforsu para hetan pasaporte tanba durante fulan hirak nia-laran notariadu la halo atendimentu kona-ba pasaporte.
“Ha’u loloos ne’e halo tratamentu iha fulan hirak liubá maibé notariadu la halo atendimentu tanba kaderneta pasaporte laiha entaun agora ne’e pasiénsia mai sena malu para halo|”, Julmira hatete.
Nia sente triste tanba ema barak demais maibé kada loron notariadu halo de’it atendimentu pasaporte baema na’in 140 de’it, tanba ne’e husu Governu see bele atendimentu kada loron ba ema barak atu nune’e ema labele sena malu tan.(*)
2,979 total views, 9 views today
Bele hare Video Seluk :
Subscribe to Timorpost
